ترامپقا يمپيچمەنت جاريالاۋ تۋرالى قارار سەناتقا تاپسىرىلدى

اقش كونگرەسىنىڭ تومەنگى پالاتاسىنىڭ وكىلدەرى ەكس-پرەزيدەنت دونالد ترامپقا يمپيچمەنت جاريالاۋ تۋرالى قاراردى سەناتقا تاپسىردى. تىكەلەي ترانسلياتسيا زاڭ شىعارۋشى ورگاننىڭ سايتىندا جۇرگىزىلدى.

نەگىزىنەن يمپيچمەنت پروتسەسى 8 اقپاننان كەيىن باستالادى. وتىرىستار بارىسىندا يمپيچمەنت مەنەدجەرلەرى اتالاتىن وكىلدەر پالاتاسىنىڭ مۇشەلەرى ايىپتاۋشىلار، ال سەناتورلار القابيلەر رەتىندە تالقىلايدى. پروتسەستىڭ توراعاسى – سەناتور، دەموكرات پاتريك ليحي. رەزوليۋتسيانى ءبىر عانا بابى بار. ول – تۇرعىنداردى قاقتىعىس ۇيىمداستىرۋعا ارانداتۋ.

CNN تەلەارناسىنىڭ حابارلاۋىنشا، ەگەر يمپيچمەنت قازىرگى پرەزيدەنتكە جاريالانسا، اقش زاڭىنا سايكەس جوعارعى سوت باسشىسى دجون روبەرتس توراعا بولار ەدى. ول ترامپتىڭ العاشقى يمپيچمەنتىنىڭ پروتسەسىندە توراعا بولعان. الايدا، ترامپتىڭ پرەزيدەنتتىك وكىلەتتىگى 20 قاڭتاردا اياقتالعانىن ەسكەرە وتىرىپ، اقش تاريحىندا تۇڭعىش رەت توراعانىڭ ءرولى زاڭ شىعارۋشىعا جۇكتەلگەن.

13 قاڭتاردا دەموكراتيالىق پارتيانىڭ باقىلاۋىنداعى وكىلدەر پالاتاسى ترامپقا يمپيچمەنت جاريالاۋ تۋرالى قاراردى ماقۇلدادى. 2019 جىلى دا ترامپتى قىزمەتىنەن كەتىرۋ پروتسەسى بولعان. بىراق سەنات 2020 جىلدىڭ باسىندا پرەزيدەنتتى اقتادى.

بۇل جولى يمپيچمەنت ءراسىمى ترامپتىڭ 6 قاڭتاردا جاساعان مالىمدەمەسىنە بايلانىستى باستالىپ وتىر. سول كۇنى ۋاشينگتوندا ترامپتى قولداۋ ءۇشىن مىڭداعان نارازىلار كاپيتوليگە باسىپ كىردى. سالدارىنان ءىرى قاقتىعىستار ورىن الىپ، ءتورت ادام قازا تاپتى.

قازىر دەموكراتتار ەلدىڭ زاڭ شىعارۋشى ورگانىنىڭ جوعارعى پالاتاسىنداعى 50 ورىندى باسقارادى. رەسپۋبليكاشىلداردىڭ سانى دا شامالاس. الايدا، قازىر ۆيتسە-پرەزيدەنت قىزمەتىن كامالا حارريس اتقاراتىندىقتان، ونىڭ پارتيالارى اۆتوماتتى تۇردە ارتىقشىلىققا يە.

ەگەر دونالد ترامپقا يمپيچمەنت جاريالاۋ ماقۇلدانسا، ول جوعارى لاۋازىم اتقارۋدان شەتتەتىلەدى.

"The Qazaq Times"