AQŞ Qıtaydıñ Şıñjañdağı äreketterin genocid dep tanıdı. Memlekettik departamenti seysenbi küni taratqan mälimdemesinde, Qıtay ükimeti Şıñjañda  wyğırlar men özge de mwsılman etnikalıq azşılıqtarğa qamau lagerleri men mäjbürli wrpaq süydirmeudi qamtığan  keñ auqımdı repressiya jürgizip, genocid men adamzatqa qarsı qılmıstar jasadı dep ayıptağan. 

Beyjiñ biliginiñ Şıñjañdağı äreketterin genocid dep tanu – Tramp ükimetiniñ bilikten keter aldında Qıtayğa qarsı soñğı şarası. Şıñjañdağı az sandı wlttarğa jasalğan qısımdar men Beyjiñniñ adam qwqıqtarın auır därejede bwzu äreketteri köptegen elderde talqılanıp keldi. Alayda, Qıtay kommunistik biligin qalay ayıpqa tartu turalı talas-tartıs wzaqqa sozıldı. The New York Times basılımı Şıñjañdağı genocidtiñ moyındaluı osı wzaq uaqıttıq talas-tartıspen, narazılıqtardıñ eñ ülken nätijesi dep bağaladı.

AQŞ memlekettik hatşısı Maykl Pompeo atalğan mälimdemeni jariyalağan kezde: "Men Şıñjañdağı wlttarğa genocid äli de jalğasıp jatır dep sanaymın. Biz QKP-nıñ wyğırlardı joyuğa jüyeli äreket etip otırğanın kuä bolıp otırmız", – dep qostadı. Sonday-aq mälimdemede QKP müşeleri älsiz ektnikalıq toptar men dini azşılıqtı mäjbürlep assimilyaciyalauğa jäne tüpkilikti joyuğa qatısqanı turalı aytıldı.

Sarapşılardıñ boljauınşa, Tramp ükimetiniñ bwl şeşimi aldağı Bayden ükimetin Qıtayğa qarsı sankciya saluğa mäjbür etedi. Bayden demokratiya men adam qwqıqtarın qoldauşı retinde Qıtaydıñ bwl äreketterin jauapsız qaldırmau mindetin aladı dep boljaydı. Soğan qosa, AQŞ-tıñ Şıñjañdağı genocidti moyındauı Europa elderine äser etetinin, aldağı uaqıtta Şıñjañdağı az sandı wlttarğa jasalğan genocidti tanitın elder qatarı tipti de köbeye tüsui mümkin.

“The Qazaq Times”