19 قاڭتاردا كوروناۆيرۋس جۇققان 1134 ادام، 18 قاڭتاردا كوروناۆيرۋس پنەۆمونياسىنا شالدىققان 118 ادام انىقتالعان. قازىر ەلدە 25 مىڭنان استام ادام (U07.1 نەمەسە كۆي+ بويىنشا 13 404, U07.2 نەمەسە كۆي- بويىنشا 11 643) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – استانا (198), پاۆلودار (151), الماتى قالاسى (112), اقمولا (108), الماتى (92), سقو (76), اتىراۋ (74), قاراعاندى (72) وبلىستارىندا. وتكەن تاۋلىكتە 948 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 8 ادام ومىردەن وتكەن.

#U07.2  دۇيسەنبى كۇنى، ياعني قاڭتاردىڭ 18-ءى كوروناۆيرۋس پنەۆمونياسىنا جاتاتىن 118 ناۋقاس جانە 3 ءولىم جاعدايى تىركەلگەن. اقپاراتى ءبىر تاۋلىككە كەشىگىپ بەرىلەتىن پنەۆمونيادان ايىققاندار سانى 149-عا ارتتى.

#جالپى  تاۋلىكتىك كورسەتكىش كۇن سايىن ارتىپ كەلەدى. قاڭتاردىڭ 13-ىنەن بەرى تاۋلىگىنە ۇدايى 900-دەن كەم ەمەس كەيس انىقتالۋدا. ماسەلەن، دۇيسەنبى كۇنى 1117  ناۋقاس انىقتالعان.

دەنمين-ءنىڭ رەسمي مالىمەتىنشە, ەمدەلىپ جاتقان 25 038 ناۋقاستىڭ 6522-ءسى اۋرۋحانادا، 18 516-سى امبۋلاتورلىق باقىلاۋدا. احۋالى ناشار 307 ناۋقاستىڭ اراسىندا 61 ادامنىڭ جاعدايى قاتتى قيىنداعان. 34 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

اقپارات مينيسترلىگىنىڭ coronavirus2020.kz سايتى مەن دەنساۋلىق ساقتاۋ مينيسترلىگىنىڭ مەديا رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز. 26 جەلتوقساننان باستاپ مينيسترلىك كەمشىلىگىن مويىنداپ، رەسمي حابارلامانىڭ فورماسىن وگەرتتى. ستاتيستيكانىڭ پنەۆمونياعا قاتىستى مەرزىمىن كورسەتىپ جاريالاۋعا كوشتى.

(!) پاندەميا مودەراتورى مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى جانە 19-ىنا، 1-4, 7 قاڭتارعا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

وسىعان دەيىن 9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭىن بيىل قاڭتار جانە اقپان ايلارىنا سايكەس كەلەدى دەپ بولجاعان. الايدا مينيستر الەكسەي تسوي سەيسەنبى كۇنگى ۇكىمەت وتىرىسىندا بۇل بولجامدى جاڭارتتى. ونىڭ سوزىنشە, ناۋرىز ايىنىڭ سوڭىنا قاراي جاعداي قيىنداپ، جۇرت كەزەكتى  شارىقتاۋ كەزەڭىن (بىلتىرعى «ماۋسىم-شىلدە قىرعىنان» – QT) وتكەرۋى مۇمكىن.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 171 مىڭنان اسسا، 1 تامىزدان بەرگى كوروناۆيرۋس پنەۆمونياسى 47 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 216 مىڭعا، ال ۇلتتىق ستاتيستيكادا 218 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. حالىقارالىق ۇيىم تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ دياگنوزى بويىنشا جاڭا انىقتالعان ناۋقاستار مەن قايتقاندار، ايىعىپ شىققانداردىڭ ايماقتارداعى كورسەتكىشى كۇندەلىكتى جاريالانادى، ال كۆي- دەرەگى تەك جيىنتىق ماندە بەرىلەدى. كوروناۆيرۋس پنەۆمونياسىنىڭ ايماقتارعا تارالۋى جونىندەگى ەسەپ مينيستر و باستا ايتقانداي كۇندەلىكتى نە اپتاسىنا ەمەس، ون كۇندە ءبىر رەت، ونىڭ وزىندە ۆەدومستۆو سايتىنا فايل فورماتىندا جۇكتەلىپ كەلەدى.

ازىرگە ۆيرۋس تارالۋ قاتەرى جاعىنان استانا، اقمولا، اتىراۋ، سقو، پاۆلودار جانە قوستاناي وبلىستارى – قىزىل; بقو، شقو، الماتى جانە قاراعاندى وڭىرلەرى – سارى ايماقتا تۇر.

پاندەميا باستالعالى جالپى ۆيرۋس جۇققانداردىڭ 3914-ءى (كۆي+ / U07.1 – 2431, كۆي- / U07.2 – 545, ىلەسپە اۋرۋلاردان – 938) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 938  ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بىلتىرعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 51-ءشى ورىندا تۇر.

"The Qazaq Times"