قازاقستاننىڭ دەنساۋلىق ساقتاۋ ءمينيسترى الەكسەي تسوي. فوتو: قر وكق

توقاەۆ قاتىسقان 1 ساۋىردەگى ۇكىمەت وتىرىسىندا دەنساۋلىق ساقتاۋ ءمينيسترى كوروناۆيرۋستىڭ قارقىنىنا بايلانىستى الداعى ءۇش ايعا ارنالعان ءۇش ءتۇرلى ستسەناري-بولجامىن مالىمدەدى.

مينيستر الەكسەي تسوي جيىندا ءساۋىر-ماۋسىم ايلارىندا جاعداي ۋشىقتى دەگەندە «پەسسيميستىك ستسەناري» بويىنشا ەلدە 370 مىڭ ادامعا ۆيرۋس جۇعىپ، 190 مىڭ ادام اۋرۋحاناعا جاتۋى مۇمكىن ەكەنىن جەتكىزدى.

ونىڭ سوزىنشە، «رەاليستىك ستسەناريدە» جازعىتۇرىم كەزىندە 250 مىڭ ادام سىرقاتتانىپ، ونىڭ 127 مىڭى اۋرۋحاناعا ءتۇسۋى ىقتيمال. سونداي-اق، مينيستر «وپتيميستىك ستسەناري» ۇلگىسىندە 140 مىڭ ادامنان دەرت انىقتالىپ، جارتىسىنان استامى، ياعني 71 مىڭ ادامعا اۋرۋحانادا ەمدەلۋى قاجەت بولادى دەپ بولجايدى. مينيستر ەلدە «رەاليستىك ستسەناري» بولا قالعان جاعدايدا، دەنساۋلىق ساقتاۋ جۇيەسى ەڭسەرە  الاتىنىن ايتادى.

بەيسەنبى كۇنگى جيىندا پرەزيدەنت توقاەۆ قوعامدا ءجيى ايتىلىپ جۇرگەن ەكپە ناۋقانىنىڭ باياۋلاۋىن، ءسوز بەن ءىستىڭ قابىسپاۋىن سىناپ، ۆاكتسيناتسيا مودەراتورلارى مينيسترلىك پەن «سك-فارماتسيا» جەتەكشىلەرىن سوككەن. ءتىپتى وتستاۆكانى مەڭزەپ ەسكەرتۋ دە جاسادى.

قازاقستاندا اقپان-ناۋرىز ارالىعىندا ۆاكتسينا ناۋقانىن باستاعانىمەن، ەكى ايدا حالىقتىڭ نەبارى 0,2% ۇلەسى نەمەسە 173 مىڭ ادام ەكپەنىڭ العاشقى دوزاسىن العان. ەكى دوزانى تولىقتاي العانداردىڭ سانى 47 مىڭ شاماسىندا عانا. مينيسترلىك مۇنى ەكپەنىڭ ازدىعىمەن تۇسىندىرەدى.

قازىر ەلدە ۆيرۋس ءورشىپ تۇر. كۇن سايىن تىركەلەتىن ناۋقاستاردىڭ ورتا سانى 1,5 مىڭ ماڭايىندا. التى ايماق ۆيرۋس كۇشەيگەن «قىزىل»، ەكى ءوڭىر «سارى» ايماقتا تۇر. ۇكىمەت ۇسىنعان دەرەككە قاراعاندا، ىندەت باستالعالى 297,5 مىڭعا جۋىق ادامنان كوروناۆيرۋس پەن سوعان ۇقساس پنەۆمونيا انىقتالعان. وسى ارالىقتا ۆيرۋس جۇققانداردىڭ 5371-ءى (كۆي+ / U07.1 – 3060, كۆي- / U07.2 – 692, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1450 ادامدى جالپى ستاتيستيكاعا ەنگىزبەيدى.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

"The Qazaq Times"