«قازاقفيلم» كينوستۋدياسى جانىنداعى «دەبيۋت» شىعارماشىلىق-وندىرىستىك بىرلەستىگى ستسەناريلەر  بايقاۋىنىڭ جەڭىمپازدارىن جاريالادى دەپ حابارلايدى «قازاقفيلم» اق ءباسپاسوز قىزمەتى.

كونكۋرسقا وتىزدان استام قىسقامەتراجدى كوركەم فيلمدەر ستسەناريلەرى تۇسكەن. ولاردىڭ ىشىنەن بەس جۇمىس ىرىكتەلىپ الىنعان بولاتىن.

اتاپ ايتقاندا، قايىرجانوۆا ۆەنەرانىڭ «تىعىلماق»، بايمۇراتوۆ ارماننىڭ «تاقيا»، راحمەتاليەۆ الەننىڭ «ءتوزىم»، جاحانوۆ بەرىكتىڭ «كەشىرىم»، سونداي-اق جىلىسباەۆا ارداقتىڭ «جۇت» ستسەناريلەرى ۇزدىك دەپ تانىلدى.

«بىزگە جىبەرىلگەن ستسەناريلەردىڭ ىشىنەن بەسەۋىن ىرىكتەپ الدىق. ولاردىڭ بارلىعى ۇستىمىزدەگى جىلى وندىرىسكە جىبەرىلەدى. ءتورت تۋىندىنىڭ رەجيسسەرى اۆتورلاردىڭ وزدەرى بولماق. ال «جۇت» ستسەناريىن ەسپەنبەتوۆ جاندوس ەسىمدى جاس رەجيسسەرگە بەرۋدى ءجون سانادىق. مۇنداي تاجىريبە «دەبيۋت» ءشوب-دە كوپتەن بەرى جاسالىنباعان بولاتىن»، - دەدى «قازاقفيلم» اق ەكسپەرتتىك كەڭەسىنىڭ تەڭتوراعاسى بەكبولات شەكەروۆ.

ەستەرىڭىزگە سالا كەتەيىك، ساۋىردە «قازاقفيلم» «دەبيۋت» ءشوب اتىنان ستسەناريلەر بايقاۋىن جاريالاعان بولاتىن. شارت بويىنشا بايقاۋعا جاس اۆتورلارمەن قاتار ءوز ءىسىنىڭ كاسىبي ماماندارى دا قاتىسا الاتىن. سايىسقا كەنجەبەك شايقاقوۆ، عازيز ناسىروۆ، ارداق جىلىسباەۆا جانە تيمۋر ماقاجانوۆتار سياقتى تاجىريبەلى اۆتورلار دا قاتىستى.

“The Qazaq Times”