اقمولا وبلىسىنىڭ اۋىلدارىندا تج جاريالانۋى مۇمكىن

25 شىلدە كۇنى اقمولا وبلىسىندا دۇلەي داۋىل جايپاپ وتكەن ەكى اۋىلدا «توتەنشە جاعداي» رەجيمى ەنگىزىلمەك.

جەكسەنبى كەشكىسىن يزوبيلنوە جانە بەستوبە اۋىلدارىندا كوتەرىلگەن داۋىلدان 5-10 مينۋتتىڭ ىشىندە 17 ەلەكتر باعانى تۇبىنەن قۇلاپ، ونداعان ءۇيدىڭ شاتىرى ءبۇلىنىپ-ۇشىپ كەتكەن. جەلەكتى القاپقا جاتاتىن اعاشتاردى تامىرىمەن قوپارىپ كەتكەن. 30-دان اسا ءۇيدىڭ استاڭ-كەستەڭى شىققان. بىرقاتار اكىمشىلىك عيماراتتار دا ايتارلىقتاي بۇلىنگەن. نەگىزگى ترانسفورماتور دا قۇلاعاندىقتان، 150-گە تارتا نىسان جارىقسىز قالعان. قازىرگى ۋاقىتتا جەدەل شتاب قۇرىلىپ، ەلەكتر جەلىلەرىن قالپىنا كەلتىرۋ جۇمىسى ءجۇرىپ جاتىر.

اقمولا وبلىسى تجد ءباسپاسوز قىزمەتى تاراتقان اقپاراتقا قاراعاندا، جەل 25-30 م/س جىلدامدىقتا تۇرعان. كەلگەن زالالدىڭ شىعىنىن ەسەپتەۋ ماقساتىندا كوميسسيا قۇرىلعان. جەرگىلىكتى شەنەۋنىكتەر زارداپ شەككەن بارلىق تۇرعىنعا كومەكتەسۋگە دايىن ەكەنىن ءبىلدىرىپ، وتەماقى رەتىندە 100 مىڭ تەڭگەدەن تولەۋگە ۋادە ەتكەن.

«بۇل تولەمگە ءوتىنىم بەرۋ مەرزىمى ءۇش اي. قۇجاتتاردى ۋاقتىلى قايتا راسىمدەپ ۇلگەرمەگەن حالىقتىڭ وسى ارالىقتا مۇمكىندىگى بار. مەنىڭ ويىمشا، ەكى كۇند تج باسقارماسىمەن جۇمىستانىپ، الەۋمەتتىك قورعاۋ باعىتىندا تامىز ايىنىڭ العاشقى كۇنى زارداپ شەككەن تۇرعىندارعا اقشا اۋدارۋعا تىرىسامىز»،– دەپ ءتۇسىندىردى ستەپنوگورسك قالاسىنىڭ اكىمى ەركەبۇلان باياحمەتوۆ.

اقمولا وبلىسى توتەنشە جاعدايلار دەپارتامەنتى باستىعىنىڭ ورىنباسارى قانات دوسپاەۆتىڭ ايتۋىنشا، ەشكىم نازاردان تىس قالمايدى، الدا ستەپنوگورسك قالاسى اكىمدىگى كوميسسيا وتىرىسىن وتكىزەدى.

دۇلەي جەلدەن بۇلىنگەن ترانسفورماتور. اقمولا وبلىسى، يزوبيلنوە اۋىلى. فوتو: اقمولا وبلىستىق تجد ءباسپاسوز قىزمەتى

“The Qazaq Times”