مايك پەنس، دونالد ترامپ جانە نەنسي پەلوسي. فوتو: ار

كەشە اقش كونگرەسىنىڭ ەكىنشى پالاتاسى قازىرگى پرەزيدەنت دونالد ترامپقا ەكىنشى رەت يمپيچمەنت جاريالادى. قۇجات كونگرەسس سەناتىنا ءوتتى. قازىر سەنات يمپيچمەنت پروتسەسىن تالقىلاۋدا. ەگەر جوعارعى پالاتا قۇجاتتى بەكىتسە، ترامپقا مەملەكەتتىك لاۋازىمداردى اتقارۋعا تىيىم سالىنباق.

رەسمي مالىمدەمەدە: «امەريكا قۇراما شتاتتارىنىڭ سەناتىندا يمپيچمەنت پروتسەسى وتەدى. ەگەر پرەزيدەنت كىنالى دەپ تانىلسا، ونى قايتادان مەملەكەت باسشىسى لاۋازىمىنا سايلانۋ مۇمكىندىگىنەن ايىرۋ تۋرالى داۋىس بەرۋ وتەدى»، – دەلىنگەن.

كەشە اقش كونگرەسىنىڭ وكىلدەر پالاتاسى پرەزيدەنت ترامپقا قارسى يمپيچمەنت پروتسەسىن تالقىلاپ، بەكىتكەن. قازىر اق ءۇي باسشىسى «ازاماتتاردى كوتەرىلىسكە يتەرمەلەپ، بيلىكتى بەيبىت بەرۋگە كەدەرگى كەلتىردى» دەپ ايىپتالىپ جاتىر. كەيبىر كونگرەسمەندەردىڭ ايتۋىنشا، ترامپتىڭ «سايلاۋ ناتيجەسى بۇرمالاندى» دەگەن پىكىرى كاپيتوليدەگى بۇلىكتىڭ باستالۋىنا تۇرتكى بولعان.

ترامپتى بيلىكتەن شەتتەتۋدى تالاپ ەتەتىن رەزوليۋتسيانى وكىلدەر پالاتاسى سەيسەنبىدە قابىلدادى. بىراق تومەنگى پالاتا بۇگىن ترامپقا قارسى يمپيچمەنتتى ماقۇلداسا دا، سەناتورلار ونى جاڭا پرەزيدەنتتى ۇلىقتاۋ راسىمىنە دەيىن قاراپ ۇلگىرمەۋى مۇمكىن. سەبەبى دجو بايدەننىڭ يناۋگۋراتسياسى قاڭتاردىڭ 20-سىندا وتەدى.

بۇعان دەيىن سەناتتا قانداي دا ءبىر وتىرىس وتكىزۋ قاراستىرىلماعان. قۇجات سەناتورلار قاراۋىنا تۇسكەننىڭ وزىندە قازىرگى پرەزيدەنتتى بيلىكتەن شەتتەتۋ ءۇشىن 100 ادامنىڭ 67-ءسى ونى قولداپ داۋىس بەرۋى قاجەت. ال ولاردىڭ تەڭ جارتىسى دەموكراتتار ەكەنىن ەسكەرسەك، رەزوليۋتسياعا قول قويۋ ءۇشىن تاعى 17 رەسپۋبليكالىقتاردىڭ داۋىسى كەرەك.

وتكەن اپتادا دەموكراتتار ۆيتسە-پرەزيدەنت مايك پەنسكە ترامپتى ىعىستىرىپ، بايدەننىڭ يناۋگۋراتسياسىنا دەيىن بيلىك ەتۋدى ۇسىنعان. كونستيتۋتسياداعى 25-تۇزەتۋ بويىنشا پەنس ترامپتى ىعىستىرىپ، مەملەكەت باسشىسى مىندەتىن ۋاقىتشا اتقارۋعا قۇقىعى بار. بىراق پەنس ءوز مالىمدەمەسىندە: «مۇنداي شەشىم ءبىزدىڭ ەلىمىزدىڭ مۇددەسىنە ساي ەمەس. وتكەن اپتادا مەن سايلاۋ ناتيجەلەرىن انىقتاۋ ءۇشىن كونستيتۋتسيالىق وكىلەتتىكتەرىمنىڭ شەڭبەرىنەن شىققان جوقپىن. ەندى مەن وكىلدەر پالاتاسىنىڭ ەلىمىزدىڭ ومىرىندەگى وسىنداي ماڭىزدى ۋاقىتتا ساياسي ويىن باستاۋىنا جول بەرمەيمىن»، – دەدى.

كاپيتولي شابۋىلىنان كەيىن دەموكراتتار ترامپقا يمپيچمەنت جاريالاۋعا دايىندىق باستادى. ولار ۋاشينگتوندا دەمونسترانتتاردىڭ ميتينگىن ترامپ ۇيىمداستىردى دەپ ايىپتاپ وتىر. 2019 جىلى «وكىلەتتىگىن اسىرا پايدالانعانى ءۇشىن» ترامپقا العاش رەت يمپيچمەنت جاريالانعان بولاتىن. دەموكراتتار جاريالاعان يمپيچمەنتتەن كەيىن رەسپۋبليكاشىلدار اق ءۇي باسشىسىن اقتاپ شىعىپ، ترامپ قىزمەتىن جالعاستىردى.

سول جىلى ترامپقا جاريالانعان يمپيچمەنتتى رەسپۋبليكالىق پارتيانىڭ بىردە-ءبىر مۇشەسى جاقتاماعان. بۇعان دەيىن كونگرەستەگى پارتيالاستارىنىڭ ەڭ كوپ قارسىلىعىنا ۇشىراعان پرەزيدەنت بيلل كلينتون بولاتىن. 1998 جىلى وعان جالعان كۋالىك بەردى دەپ ايىپ تاعىلعاندا، دەموكراتيالىق پارتيادان سايلانعان 5 كونرگەسسمەن كلينتونعا قارسى داۋىس بەرگەن. كەيىن سولاردىڭ تورتەۋى رەسپۋبليكالىق پارتياعا اۋىسىپ كەتتى.

"The Qazaq Times"