سايلاۋ قارساڭىندا: كونتر-اكتسيا تۋرالى ەسكەرتۋ. بلوكتالعان باقىلاۋ ۇيىمى. شىمكەنت پوليتسياسىنىڭ "تاركىلەۋ وپەراتسياسى"

2 جەلتوقسان كۇنى قازاقستان پرەزيدەنتى توقاەۆ 2021 جىلدىڭ 10 قاڭتارىندا وتەتىن ءماجىلىس جانە ءماسليحاتتار سايلاۋىن «اشىق ءارى ءادىل وتكىزۋگە نيەتتى» ەكەنىن مالىمدەگەن ەدى. دەگەنمەن توراعاسىنىڭ "كىتاپحاناعا" جانە ءماجىلىس دەپۋتاتتىعىنان دامەلى داريعا نازارباەۆاعا تۋىستىق جاقىندىعى بار ورتالىق سايلاۋ كوميسسياسى 2019 جىلعى پرەزيدەنت سايلاۋىنان كەيىن باقىلاۋشىلارعا قويىلاتىن تالاپتى كۇشەيتە ءتۇستى. سونداي-اق، اتقارۋ ورگاندارى تاراپىنان قىسىم  ارتقان.

جەلتوقساننىڭ باسىندا قابىلدانعان قاۋلىعا سايكەس، تاۋەلسىز باقىلاۋشىلار بۇل جولى بۇرىنعىشا كەز كەلگەن قوعامدىق ۇيىمنان قاتىسا المايدى ءارى فوتو-ۆيدەو ءتۇسىرۋ مۇمكىندىگى شەكتەلگەن. وعان قوسا، 28 جەلتوقسان كۇنى وسك سايلاۋ ۋچاسكەسىنە تەك پتر تەستىن تاپسىرىپ، تەرىس قورىتىندى العان باقىلاۋشىلاردىڭ جىبەرىلەتىنىن مالىمدەگەن. بۇل دا ءوز الدىنا داۋعا اينالىپ ۇلگەردى. كەيبىر باقىلاۋشىلار تەست تاپسىرۋ قيىنداعانىن ايتسا، ەندى ءبىرى نەگىزسىز سەبەپتەرمەن باقىلاۋ ميسسيسىنان شەتتەتىلگەن نەمەسە تۋىستارى ارقىلى سەس كورسەتىلگەن. پتر سىناماسىن تاپسىرماعان اتىراۋلىق بەلسەندىگە "كوروناۆيرۋس انىقتالعانى" حابارلانعان. سونىمەن قوسا، الماتى قالاسىنىڭ سانيتارلىق ەپيدەميولوگيالىق قىزمەتى جۇزدەگەن باقىلۋشىدان تەست العان ەكى بىردەي زەرتحانانىڭ جۇمىسىن زاڭسىزدىعىن حابارلاپ، ناتيجەسىن جارامسىز دەپ تانىعانىن حابارلادى. مۇنداي قيسىنسىز ءارى كۇتپەگەن جاعدايلار از ەمەس ءتارىزدى.

كارانتين – "ەركىندىك قاناتىن" قايىرۋعا سىلتاۋ ما؟

استانانىڭ بايقوڭىر اۋداندىق سانيتارلىق-ەپيدەميالىق باقىلاۋ باسقارماسى سايلاۋدى باقىلاۋعا وقتالعان "ەركىندىك قاناتى" قوعامدىق قورىنىڭ جۇمىسىن جۇما كۇنى ەكى اپتالىق كارانتينگە اۋىستىرۋعا قاۋلى قابىلدادى. بۇل تۋرالى قور قۇرىلتايشىسىنىڭ ءبىرى ەلەنا شۆەتسوۆانىڭ ازاتتىققا ايتۋىنشا، قاشىقتان جۇمىس ىستەپ جۇرگەن قىزمەتكەردىڭ بىرىنەن 28 جەلتوقسان كۇنى كوروناۆيرۋس انىقتالعان.

"كەشە كەشكە ءبىزدى 8 قاڭتاردان باستاپ كارانتينگە جىبەرۋ تۋرالى قاۋلى جىبەردى. كىسى 28 كۇنى اۋىرعان، ال ءبىزدى 8 قاڭتاردان باستاپ كارانتينگە وتىرعىزعىسى كەلەدى", – دەيدى ول.

استانانىڭ سانيتارلىق-ەپيدەميالىق دەپارتامەنتى باستىعى سارحات بەيسەنوۆا اقپارات قۇرالىنا بەرگەن پىكىرىندە ۇيىمداعى كارانتين 12 قاڭتار كۇنى اياقتالاتىنىن ايتادى. سانيتار-دارىگەر كارانتيندەگى ۇيىمنان انىقتالعان سىرقات ماماننىڭ ناقتى قاي كۇننەن باستاپ جۇمىسقا شىقپاعانىنان حابارسىز سياقتى.

پوليتسيا "اڭدىعان" كۋالىك

سەنبى، 9 قاڭتار كۇنى شىمكەنت پوليتسياسى بەلسەندىدەن "HAQ" ازاماتتىق قوزعالىسىنىڭ  600 باقىلاۋشىسىنىڭ كۋالىگىن *تارتىپ العان. قوزعالىس جەتەكشىسى  توعجان قوجاليەۆا مەن استاندان كەلگەن قۇجاتتى شىمكەنت اۋەجايىنان كۇتىپ العان جەرگىلىكتى باقىلاۋشى امانۇللا رامانقۇلدىڭ مالىمەتىنشە، قىزىلوردا، تۇركىستان وڭىرلەرى مەن شىمكەنت قالاسىنداعى 600 باقىلاۋشىنىڭ قولىنا بەرىلۋى ءتيىس قۇجاتتاردى پد ەكسترەميزمگە قارسى ءىس-قيمىل باسقارماسى تاركىلەگەن.

 "مەنى زاڭسىز تەكسەردى، جولدامالاردى تاركىلەدى. بۇل ءۇش ايماقتا 600 باقىلاۋشى سايلاۋعا باقىلاۋشى رەتىندە قاتىسا المايدى دەگەن ءسوز", – دەيدى پوليتسەي جولىن كەسكەن رامانقۇل ازاتتىققا.

ينتەرنەت باسىلىمىنىڭ قولى جەتكەن دەرەكك قاراعاندا، پوليتسيا حاتتاماسىندا تاركىلەۋ "قوعامدىق قاۋىپسىزدىكتى قامتاماسىز ەتۋ" ماقساتىندا جۇرگىزىلگەنى جازىلعان.

وسىنداي جاعدايعا تاپ بولعان تاعى ءبىر بەلسەندى ايجان جولداسوۆانى دا قاڭتاردىڭ 8-ءى پوليتسەي ۇستاپ، ونداعان باقىلاۋشىعا تيەسىلى كۋالىكتى تارتىپ العان. بۇل 67 كۋالىكتى استاناداعى "مۇقالماس" ۇيىمى ايماققا سالەمدەمە رەتىندە جىبەرگەن. شىمكەنتتەگى ەڭبەكشى اۋداندىق پوليتسيا باسقارماسى قىزمەتكەرلەرى بەلسەندىنىڭ الدىنان شىققان.

*10 قاڭتارعا قاراعان ءتۇنى ازاتتىق اباي اۋداندىق پروكۋراتۋراسى پوليتسيانىڭ بۇل ارەكەتى "قازاقستان كونستيتۋتسياسى مەن سايلاۋ تۋرالى زاڭىن ورەسكەل بۇزعان پوليتسيا ارەكەتىن" ايىپتاپ، 600 كۋالىك كەرى قايتارىپ بەرگەنىن حابارلادى. قۇجاتتى قولىنا العان امانۇللا رامانقۇل سايلاۋدى باقىلاۋعا مۇمكىندىك بەرەتىن جولدامانى ۇلەستىرۋشى ايماق وكىلدەرىنىڭ قايتىپ كەتكەنىن ايتادى. كۋالىك ءتيىستى يەلەرىنىڭ قولىنا دەر كەزىندە جەتپەۋى مۇمكىن دەسەدى.

بەلسەندىگە حابارشىدان ەسكەرتۋ

Oyan, Qazaqstan ازاماتتىق قوزعالىسىنىڭ مۇشەسى اسەم جاپيشەۆ تەلەگرام-ارناسىندا ۇيىم جاستارى سايلاۋ كۇنى وتكىزۋگە نيەتتەنگەن بەيبىت جيىنعا قارسى ارانداتۋ اكتسياسى ۇيىمداستىرىلىپ جاتقانى تۋرالى ەسكەرتكەن "حابارشىنىڭ" جازباسىن جاريالادى.

جاپيشەۆاعا "بيلىكتىك كونتر-جيىن" جونىندە حابارلاعان "ەرىكتىنىڭ"  (وزىن تانىستىرۋى بويىنشا) سوزىنشە، "سەنبى كۇنگى نۇر وتاننىڭ پارتياسىنىڭ شەشىمىمەن جەكسەنبىدە قايرات بيسەمباەۆ باستاعان 100 شاقتى جاس پەداگوگ پەن ستۋدەنت قدت، دەمپارتيا جانە  Oyan, Qazaqstan-عا قارسى  ميتينگكە شىقپاق" كورىنەدى.

بۇعان دەيىن 10 قاڭتارعا بەلىگىلەنگەن ءماجىلىس جانە ءماسليحاتتار سايلاۋى كۇنى الماتى قالاسىندا ءارتۇرلى ۇستانىمداعى وپپازيتسيالىق كۇشتەر نارازىلىق شەرۋىن وتكىزەتىنىن حابارلاعان. جەكسەنبىدەگى ساياسي ناۋقاندا بيۋللەتەندى بۇلدىرۋگە ۇندەيتىن Oyan, Qazaqstan قوزعالىسى مەن بەلسەندى بويكوتقا شاقىرعان دەمپارتيا باستاماشىل توبى بىردەي ۋاقىتتا جانە ءبىر جەردە ميتينگ وتكىزۋدى جوسپارلاعان. ال قازاقستاندا قىزمەتىنە تىيىم سالىنعان، شەتەلدەن ساياسي باسپانا العان ەكس-بانكير مۇحتار ءابليازوۆ باسقاراتىن قدت ۇيىمى "بيلىك پارتياسىنىڭ ۇپايىن كەمىتۋ جانە اشكەرەلەۋ ماقساتىندا" جاقتاستارىن "اق جول" پارتياسىنا داۋىس بەرۋگە ۇگىتتەپ، تۇستە 20 شاقتى قالاداعى قارسىلىق جيىنىنا قاتىسۋعا شاقىرعان.

*شىمكەنت پوليتسياسى تاركىلەپ، كەيىننەن پروكۋراتۋرا قايتارىپ بەرگەن باقىلاۋشىلاردىڭ كۋالىكتەرى  تۋرالى اقپارات تولىقتىرىلدى

“The Qazaq Times”