فوتو: https://newtimes

ۇلىبريتانيادا شىققان كوروناۆيرۋستىڭ وزگەرگەن ءتۇرى ەۋروپانىڭ 22 ەلىنە تاراپ ۇلگەردى. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا ايماعى بيۋروسىنىڭ باسشىسى حانس كليۋگە مالىمدەدى.

سوڭعى اپتادا جاڭا شتامم كەز كەلگەن جاستاعى ادامداردان انىقتالعان. سوندىقتان ول بۇكىل الەمگە تاراپ، ۇلىبريتانياداعىداي باستى كوروناۆيرۋسقا اينالۋ قاۋپى بار.

ددسۇ ەۋروپالىق بيۋروسىنىڭ ديرەكتورى حانس كليۋگە: «كوروناۆيرۋسپەن كۇرەستە ۇجىمدىق يممۋنيتەت ماڭىزدى ءرول ويناۋى ءتيىس. بىراق بۇل ناتيجەگە جەتپەس ءۇشىن الدىمەن ۆيرۋستىڭ تارالۋىن ازايتۋ قاجەت. سەبەبى ۆاكتسينا دەرتكە قانشالىقتى ۇزاق توسقاۋىل قويا الاتىنى ءالى بەيمالىم»، – دەيدى.

جەلتوقساننىڭ اياعىندا ۇلىبريتانيادا شىققان كوروناۆيرۋستىڭ وزگەرگەن جاڭا ءتۇرى نيدەرلاند، دانيا جانە اۆستراليادا دا تىركەلدى. مالىمەتتەر بويىنشا، ۆيرۋستىڭ جاڭا شتامى ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. انگليانىڭ باس دارىگەرى، پروفەسسور كريس ۋيتتي دۇنيەجۇزىلىك دەنساۋلىق ساقتاۋ ۇيىمىنا ەسكەرتۋ جىبەرگەنىن جانە شۇعىل زەرتتەۋ جاسالىپ جاتقانىن جەتكىزدى. جاڭا شتامم الدىڭعى كوروناۆيرۋسقا قاراعاندا ادامدارعا تەز جۇعاتىنى انىقتالعان. الەمنىڭ كوپتەگەن ەلى كورولدىكپەن اۋە قاتىناسىن توقتاتىپ، بۇل ەلدەردەن كەلگەن ادامداردى قاتاڭ تەكسەرۋگە كىرىستى.

قازىر ۇلىبريتانيا ەۋروپا بويىنشا كوروناۆيرۋستان ەڭ كوپ زارداپ شەگىپ وتىر. كەشە كورولدىك اۋماعىندا 62 مىڭنان استام تۇرعىننان قاۋىپتى ينفەكتسيا تابىلىپتى. 1 مىڭنان استام ادام كوز جۇمعان. بۇل وتكەن جىلدىڭ ساۋىرىنەن بەرى بولماعان كورسەتكىش. جاعدايدىڭ ودان سايىن كۇردەلەنە تۇسۋىنە بايلانىستى انگليا مەن شوتلانديا وسى اپتادا جاڭا شەكتەۋ شارالارىن ەنگىزدى. وعان سايكەس، تۇرعىنداردىڭ سىرتقا شىعۋىنا بولمايدى.

"The Qazaq Times"