كورنەكى سۋرەت. فوتو: اشىق دەرەككوز

كەلەر جىلعى 10 قاڭتارعا بەلگىلەنگەن ءماجىلىس جانە ءماسليحات سايلاۋىن باقىلايتىن Voices of Kazakhstan اتتى جاڭا پلاتفورما پايدا بولدى.

يتالياداعى ادام قۇقىقتارى جونىندەگى فەدەراتسيالىق قور (FIDU) پرەزيدەنتى انتونيو ستانگو مەن اقش-تا تۇرىپ جاتقان قازاقستاندىق كاسىپكەر بارلىق مەڭدىعازيەۆ جەتەكشىلىك ەتەتىن Freedom Kazakhstan قورى (FKF) الداعى پارلامەنت سايلاۋىنىڭ ناتيجەلەرى تۋرالى مالىمەتتەر جاريالاپ وتىراتىن Voices of Kazakhstan بىرلەسكەن جوباسى اشىلعانىن حابارلادى.

اتالمىش جوبا Telegram چات-بوتتارىنىڭ كومەگىمەن جۇزەگە اسادى. جوبانى 23 جەلتوقسان كۇنى «اشىق ديالوگ» قورىنىڭ پرەزيدەنتى ليۋدميلا كوزلوۆسكا مەن «ۋرالسكايا نەدەليا» باسىلىمىنىڭ ديرەكتورى تامارا ەسلياموۆا تانىستىردى.

FKF قورىنىڭ جەتەكشىسى بارلىق مەڭدىعازيەۆتىڭ سوزىنشە، جاڭا پلاتفورما بەلارۋس بەلسەندىلەرىنىڭ پرەزيدەنت سايلاۋى كەزىندەگى تاجىريبەگە سۇيەنە وتىرىپ جاسالعان. سونداي-اق بۇل بارلىق تاۋەلسىز باقىلاۋشىلاردى بىرىكتىرۋگە مۇمكىندىك بەرەدى دەپ كوزدەلگەن.

«ىندەت كەزىندە حالىقارالىق قاۋىمداستىق تاراپىنان كوپتەگەن باقىلاۋشىلار مەن جۋرناليستەر كەلە المايتىندىقتان انتونيو ستانگودان سايلاۋدى وبەكتيۆتى باقىلاۋعا كومەكتەسۋىن سۇراعانمىن. ول قولدادى. باستى تالاپ – سايلاۋشىلار بيۋللەتەندەردى ەكى جاعىنان انىق ەتىپ ءتۇسىرىپ، جولداۋى ءتيىس»، – دەدى بارلىق مەڭدىعازيەۆ.

تەحنيكالىق توپ وكىلدەرىنىڭ ايتۋىنشا، سايلاۋ اياقتالعاننان كەيىن حابارلامالار سۇرىپتالىپ، تەز ارادا ناتيجەسى جاريالاناتىن بولادى. جوباعا بارلىق ازاماتتار، سايلاۋعا ءتۇسىپ جاتقان پارتيا وكىلدەرى دە قاتىسا الادى.

قازاقستاندا ءماجىلىس جانە ءماسليحات سايلاۋى 10 قاڭتاردا وتەدى. وعان «Nur Otan»، «اقجول»، «ادال»، «اۋىل» جانە «قازاقستان حالىق پارتياسى» قاتىسادى. وسك مالىمەتىنشە، بەس پارتيا ءماجىلىس سايلاۋىنا – 312 كانديدات (90 ايەل، 222 ەر ادام), ماسليحاتقا 832 كانديدات ۇسىنعان.

"The Qazaq Times"