ۇقمك جەتەكشىسى ق.تاشيەۆ. فوتو: ازاتتىق/قىرعىز.

قىرعىزستاننىڭ ۇلتتىق قاۋىپسىزدىك جونىندەگى مەملەكەتتىك كوميتەتى كەيبىر ەلدەردىڭ قىرعىزستانداعى ىشكى ساياسي جاعدايعا كيلىگۋگە ارەكەتتەنىپ جاتقانىن ايتتى. بۇل تۋرالى قىرعىزستان ۇقمك جەتەكشى قامشىبەك تاشيەۆ بۇگىنگى ءباسپاسوز جيىنىندا مالىمدەدى. ول سونداي-اق، وسى ماسەلە بويىنشا بىرنەشە ادامنىڭ قامالعانىن دا جەتكىزدى.

ءباسپاسوز جيىنىندا تاشيەۆ بىرقاتار جوعارى لاۋازىمدىلارعا قىلمىستىق ءىس قوزعالىپ جاتقانى تۋرالى دا مالىمدەدى. ونىڭ ايتۋىنشا، قىلمىستىق ءىس قوزعالعاندار اراسىندا جوعارى سوت ءتورايىمى مەن پارلامەنت دەپۋتاتتارى دا بار. بۇعان دەيىن جەمقورلىق جانە مەملەكەت قارجىسىنا قول سالۋ ايىبىمەن ءىس قوزعالىپ جاتقان رايىمبەك ماتىرايىموۆقا تيەسىلى مۇلىكتەردىڭ (اقشالاي جانە جىلجىمايتىن مۇلىكتەرى) مەملەكەت قازىناسىنا وتكىزىلگەنىن جەتكىزدى.

قامشىبەك تاشيەۆ اتالعان قۇزىرەتتى ورگان جەتەكشىسى بولىپ قازان ايىنىڭ باس شەنىندەگى ساياسي وزگەرىستەر كەزىندە كەلگەن. ونىڭ ەلدەگى بيلىكتى ۇستاپ وتىرعان سادىر جاپاروۆتىڭ جاقىن دوسى ەكەنى دە قىرعىز اقپارات قۇرالدارى اشىق جازعان. كەزەكتى جيىن ونىڭ بۇل قىزمەتكە كەلگەننەن كەيىنگى العاشقى كەڭەيتىلگەن ءباسپاسوز جيىنى. ول بارلىق مەملەكەتتىك قىزمەتكەرلەردى دەكلاراتسياسى بويىنشا تەكسەرەتىنىن جەتكىزگەن.

جيىن سوڭىندا تاشيەۆ كەيبىر مەملەكەتتەردىڭ قىرعىزستانداعى ىشكى ساياسي پروتسەستەرگە ارالاسۋعا ارەكەتتەنىپ وتىرعانىن، بۇل تۋرالى ۇقمك-نىڭ ناقتى دالەلدەرى بار ەكەنىن جەتكىزدى. وسى ماسەلە بويىنشا بىرقاتار ادامداردىڭ تۇتقىندالعانىن دا ايتتى. بىراق، قىرعىزستاننىڭ ىشكى ىسىنە كيلىگۋ ناقتى قايسى ەلدەردەن بولىپ جاتقانىن اشىق ايتقان جوق.

“The Qazaq Times”