بەكشين: الماتىداعى ەپيدەميا احۋالى كۇردەلەنە ءتۇستى

الماتى قالاسىنداعى كوروناۆيرۋس تارالۋى كۇشەيە باستادى.

بۇگىن، 24 جەلتوقسان كۇنى الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتار دارىگەرى جانداربەك بەكشين ونلاين بريفينگ بارىسىندا وسى ايدا احۋال قيىنداعانىن راستادى. ماماننىڭ ايتۋىنشا، كۇزدىڭ باسىندا كوروناۆيرۋس جۇقتىرعانداردىڭ سانى تومەندەگەن. الايدا قازان ايىنان باستاپ قايتا وسكەن.

 «ىندەت بويىنشا الماتى قالاسىندا ەپيدەميولوگيالىق جاعدايىنىڭ ءوربۋى الدىن الا بولجامداعان مولشەرگە سايكەس كەلىپ وتىر: جەلتوقسان ايىندا 1 اپتادا – 420, 2 اپتادا – 460, 3 اپتادا – 510, 4 اپتادا – 560 جاعداي. ايدىڭ قورىتىندىسى 1900-عا جانە پەسسيميستىك باعىتتا جۇرسە 2200 جاعدايعا جەتۋى مۇمكىن»، – دەدى جانداربەك بەكشين.

قازاندا – 366 جاعداي، قاراشادا – 1399 جاعداي جانە جەلتوقسان ايىندا ازىرگە 1635 جاعداي انىقتالعان. 18 مىڭعا جۋىق ناۋقاستىڭ 16 مىڭنان استامى ايعىپ شىققان. وكىنىشكە قاراي، 370 ادام  اۋرۋدان قايتىس بولعان.

«الماتى قالاسىنداعى ەپيدەميولوگيالىق جاعدايعا كەلەتىن بولساق، بۇگىن كۇردەلى كۇيدە. جىل باسىنان بەرى 17 790 ادام كوروناۆيرۋس جۇقتىرعان، سونداي-اق تامىز ايىنان باستاپ ەسەپكە الىنعان ەتيولوگياسى انىقتالماعان پنەۆمونيانىڭ 1349 جاعدايى تىركەلدى»،– دەدى ول.

پاندەميا باستالعالى جالپى ۆيرۋس جۇققانداردىڭ 3465-ءى (كۆي+ / U07.1 – 2218, كۆي- / U07.2 – 483, ىلەسپە اۋرۋلاردان – 764) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 764 ادامدى جالپى ستاتيستيكاعا قوسىپ ەسەپتەمەيدى. ازىرگە ۆيرۋس تارالۋ قاتەرى جاعىنان اتىراۋ وبلىسى – قىزىل ايماقتا، استانا مەن الماتى قالاسى، سقو، بقو، اقمولا، قوستاناي، پاۆلودار وڭىرلەرى – سارى ايماقتا تۇر.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 49-شى ورىندا تۇر.

"The Qazaq Times"