فوتو: The Guardian

COVID-ءتىڭ جاڭا شتامى (VUI-202012/01) ۇلىبريتانيادا تىركەلىپ، ۆيرۋستى جۇقتىرۋ دەڭگەيى كۇرت ارتقان. وسىعان بايلانىستى ەلدە ءتورتىنشى دەڭگەيلى لوكداۋن ەنگىزىلىپ، بىرقاتار مەملەكەتتەر ۇلىبريتانيامەن اۋە بايلانىسىن ۋاقىتشا توقاتتى.

The Guardian مالىمەتىنشە، ۆيرۋستىڭ جاڭا شتامى ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. انگليانىڭ باس دارىگەرى، پروفەسسور كريس ۋيتتي  دۇنيەجۇزىلىك دەنساۋلىق ساقتاۋ ۇيىمىنا ەسكەرتۋ جىبەرگەنىن جانە شۇعىل زەرتتەۋ جاسالىپ جاتقانىن جەتكىزدى. ۆيرۋستىڭ باسقا مۋتاتسياسىنىڭ تابىلعانىن وڭتۇستىك افريكا رەسپۋبليكاسىنىڭ دەنساۋلىق ساقتاۋ مينيسترلىگى دە حابارلادى. ونىڭ دا تارالۋ قارقىنى جوعارى.

قاۋىپتى ۆيرۋستىڭ الدىن الۋ ءۇشىن كارناتين تالاپتارى بۇرىنعىدان قاتاڭداتىلدى. بۇگىننەن باستاپ لوندوندا جانە انگليانىڭ وڭتۇستىك-باتىسىندا ساۋدا جانە قىزمەت ەتۋ ورىندارى تۇگەل جابىلىپ، 18 ميلليون حالىققا تۋىستارىمەن ارالاسۋعا تىيىم سالىنادى. تەك شاشتاراز جانە سپورت كلۋبتارى سەكىلدى اسا قاجەت قىزمەت ورتالىقتارى جۇمىس ىستەيدى.

وسىعان دەيىن ۇلىبريتانيا زاڭىندا كارانتين شەكتەۋلەرىنىڭ تەك ءۇش دەڭگەيى عانا قاراستىرىلعان. وسى كۇنگە دەيىن ەل لوكداۋننىڭ ءۇشىنشى دەڭگەيىندە بولعان. ونىڭ ءوزى «اسا جوعارى ەپيدەميالىق قاۋىپ تونگەندە» ەنگىزىلەدى.

ەلدىڭ دەنساۋلىق ساقتاۋ ءمينيسترى مەتت حەنكوك كورولدىكتە كوروناۆيرۋستىڭ بۇرىنعىدان جىلدام تارالاتىن شتاممى انىقتالعانىن 14 جەلتوقساندا حابارلاعان. احۋالدىڭ ۋشىعۋىنا بايلانىستى مالىمدەمە جاساعان بريتانيا پرەمەر-ءمينيسترى بوريس دجونسون: «ۆيرۋستىڭ جاڭا ءتۇرى تۋدىرۋى مۇمكىن قاۋىپكە بايلانىستى بۇعان دەيىن جوسپارلاعانىمىزداي روجدەستۆونى ەركىن تويلاي المايتىندىعىمىزدى حابارلاعىم كەلەدى. جاڭا شەكتەۋلەر جاريالانعان ايماقتاردىڭ تۇرعىندارى مەرەكە كۇندەرى ءوز وتباسى مۇشەلەرىنەن باسقالارىمەن ارالاسپاۋى كەرەك»، – دەدى. جاڭا شتامنىڭ تىركەلگەندىگى جايلى مالىمەت تاراي سالىسىمەن، كانادا، ەۋروپانىڭ بىرقاتار ەلدەرى مەن لاتىن امەريكاسى ۇلىبريتانيامەن اۋە بايلانىسىن ۋاقىتشا توقتاتتى.

ەلدە كارانتيننىڭ كۇشەيۋىنە نارازىلار از ەمەس. كەشە لوكداۋننىڭ ەنگىزىلۋىن قارسى شىققاندار پارلامەنت ءۇيىنىڭ الدىنا جينالدى. بەيبىت ەرەۋىلدى اتقا مىنگەن پوليتسيا ارالاسپاي، باقىلاپ تۇردى. وتكەن سەنبىدە پرەمەر-مينيستر بوريس دجونسون ەل استاناسىندا جانە بريتانيانىڭ وڭتۇستىك-شىعىسىندا جاڭا جىل الدىندا شەكتەۋ شارالارىن كۇشەيتەتىنىن ايتىپ، مەرەكەنى كەڭىنەن تويلاۋعا تىيىم سالعان بولاتىن. ول بۇل تالاپتى كوروناۆيرۋستىڭ جاڭا ءتۇرىنىڭ پايدا بولۋىمەن ءتۇسىندىردى.

الەم بويىنشا قاۋىپتى ۆيرۋس جۇقتىرعاندار سانى 76,8 ميلليونعا جەتتى. كوروناۆيرۋس العاش قىتايدىڭ ۋحان قالاسىندا تىركەلگەن. قازىر ۇلىبريتانيا كوروناۆيرۋستان قايتىس بولعاندار سانى بويىنشا ەۋروپادا يتاليادان كەيىن ەكىنشى ورىندا تۇر. ۆيرۋس جۇقتىرعاندار كۇرت كوبەيىپ، مەديتسينا قىزمەتكەرلەرىنىڭ كۇشى جەتپەي جاتىر. وتكەن اپتانىڭ وزىندە اۋرۋحانالارداعى ناۋقاستاردىڭ سانى 18,5 مىڭ بولعان. بۇل پاندەميانىڭ العاشقى تولقىنىنداعى تسيفرلاردان ءسال عانا تومەن.

"The Qazaq Times"