فوتو: eadaily.com

الەمدە كوروناۆيرۋس جۇقتىرعاندار سانى 69 ميلليونعا جۋىقتادى. دەرتتىڭ الدىن الۋ ءۇشىن بىرقاتار ەلدەر ۆاكتسيناتسيالاۋدى باستاپ، كارانتيندى قاتاڭداتپاق.

بۇعان دەيىن سىناقتان ءساتتى ءوتىپ، كوروناۆيرۋستى ەمدەۋدە 90%-دان ارتىق دالدىك كورسەتكەن ۆاكتسينالار قاتارىندا Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسى بار. امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان استام وڭ ناتيجە كورسەتكەن.

اقش-تا كوروناۆيرۋستىق ەپيدەميا باستالعالى بەرى العاش رەت ءبىر تاۋلىكتە ءۇش مىڭنان استام ءولىم جاعدايى تىركەلدى. 10 جەلتوقسانداعى جاعداي بويىنشا اقش-تا 15 381 450 ادام كوروناۆيرۋس جۇقتىرعان. ەلدە ىندەت سالدارىنان بارلىعى 288 مىڭ ادام كوز جۇمعان. الداعى اپتادان باستاپ اقش-تا ۆاكتسيناتسيالاۋ باستالادى.

ۆيرۋستان قاتتى زارداپ شەككەن ەۋروپا ەلدەرىنىڭ ءبىرى – ۇلىبريتانيا. پاندەميا باستالعالى مۇندا 1,75 ميلليون دەرەك تىركەلىپ، 62 مىڭنان استام ادام قايتىس بولعان. وسى اپتادا بىرىككەن كورولدىكتە كوروناۆيرۋس ۆاكتسيناسىن سالۋ باستالدى. Pfizer كومپانياسى وندىرگەن ۆاكتسينانى العاشقى بولىپ 90 جاستاعى مارگارەت كينان ەسىمدى بريتاندىق ايەل قابىلدادى. ەلدىڭ دەنساۋلىق ساقتاۋ ءمينيسترى مەتت حانكوك حالىقتى ۆاكتسيناتسيالاۋ كەلەسى اپتادا باستالاتىنىن جانە ەكپەنىڭ 40 ميلليون دوزاسىنا تاپسىرىس بەرىلگەنىن حابارلادى.

گەرمانيادا 1,2 ميلليوننان استام كەيس تىركەلىپ، 20 مىڭادام اجال قۇشقان. ەلدىڭ دەنساۋلىق ساقتاۋ ءمينيسترى دەرتكە قارسى ەكپە ەگۋ جىل اياعىنا دەيىن باستالاتىنىن حابارلادى. وسى ماقساتتا ەل اۋماعىندا ەكپە جاسايتىن 400 ورتالىق قۇرىلماق. بيلىك وكىلدەرى ۆاكتسينا تەگىن بولاتىنىن جاريالادى. ونى ساتىپ الۋعا، جەتكىزۋگە جانە ورتالىقتاردى جابدىقتاۋعا بارلىق شىعىن مەملەكەت تاراپىنان بولىنەدى. ەگەر كۇن سايىن 100 مىڭ ەكپە جاسالاتىن بولسا، 15 ميلليون ادامعا ۆاكتسينا ەگۋ ءۇشىن 5 ايداي ۋاقىت كەتەدى.

يتاليادا ەكپە تەگىن ءارى ەرىكتى سالىناتىن بولدى. ەلدىڭ دەنساۋلىق ساقتاۋ ءمينيسترى يتاليا بيلىگى 202 ملن دوزا ساتىپ الۋدى جوسپارلاپ وتىرعانىن مالىمدەدى. بۇل 60 ملن-نان استام ادام تۇراتىن ەلگە ارتىعىمەن جەتۋى ءتيىس. سونداي-اق مينيستر روجدەستۆو مەن جاڭا جىلدى اتاپ ءوتۋ كەزىندە ءجۇرىس-تۇرىستى شەكتەيتىن جاڭا ەرەجەلەر ازىرلەنىپ جاتقانىن ەسكەرتتى.

ۋكراينادا كارانتين ءتارتىبى مەن توتەنشە جاعداي رەجيمى كوكتەمگە دەيىن ۇزارتىلدى. مۇنىمەن قاتار قاڭتاردىڭ 8-ءى مەن 24-ءى ارالىعىندا قاتاڭ كارانتين ەنگىزىلمەك. ياعني وسى مەزگىلدە مەيرامحانالار مەن ءدامحانالار جابىلىپ، ولار تاعامدى جەتكىزىپ بەرۋ جۇيەسى بويىنشا قىزمەت كورسەتۋگە كوشەدى. كينوتەاترلار، فيتنەس زالدار جانە ساۋدا ورىندارىن دا جابۋ قاراستىرىلعان. جانە دە كەز كەلگەن ءىس-شارانى وتكىزۋگە تىيىم سالىنادى. قازىر ۋكراينادا ۆيرۋستى جۇقتىرعاندار سانى 845 مىڭنان اسقان. دەرتتەن 14 مىڭ ناۋقاس كوز جۇمدى.

بەلارۋس ۇكىمەتى ەلدەن شەتەلگە شىعۋعا ۋاقىتشا تىيىم سالماق. ەل بيلىگى مۇنى كوروناۆيرۋسپەن بايلانىستىرىپ وتىر. تىيىم 10 كۇننەن كەيىن كۇشىنە ەنەدى. شەكتەۋلەر اۆتوجول شەكارا پۋنكتتەرىندە، تەمىرجول ۆوكزالدارىندا جانە وزەن پورتتارىندا قولدانىلادى. سوڭعى مالىمەتتەر بويىنشا، ەلدە 150 مىڭنان استام كەيس تىركەلگەن.

ءازىربايجاندا ۆيرۋس جۇقتىرۋدىڭ 52%-ى باكۋدە تىركەلگەن. سول سەبەپتى باكۋ مەن تاعى 4 قالا جانە 11 اۋداننىڭ تۇرعىندارى جەلتوقساننىڭ 14-ىنەن باستاپ كوشەگە تەك سمس-رۇقسات ارقىلى شىعا الادى. شەكتەۋ قاڭتاردىڭ 18-ىنە دەيىن جالعاسادى. كارانتيندى قاتاڭداتۋ ۆيرۋستى جۇقتىرعاندار سانىنىڭ ارتۋىنا بايلانىستى قابىلدانعان.

قازىر دەرتتى كۇن سايىن 4 مىڭنان اسا ادام جۇقتىرۋدا. ازىق-تۇلىك دۇكەندەرى مەن ءدارىحانالاردان باسقا مەيرامحانالار، ءدامحانالار جانە وزگە دە دۇكەندەر جابىلادى. باكۋگە كىرۋ شەكتەلىپ، كارانتين شارالارى مەن ۇيدە وقشاۋلانۋدى قاداعالاۋ كۇشەيتىلەدى.

يران بيلىگى دە كوروناۆيرۋستىڭ الدىن الۋ ماقساتىندا ۆاكتسيناتسيالاۋعا رۇقسات بەردى. جەرگىلىكتى عالىمدار ازىرلەگەن جاڭا ءدارى 18 بەن 50 جاس ارالىعىنداعى ەرىكتىلەرگە ەكى مارتە ەگىلەدى. كەيىن ازاماتتاردىڭ اعزاسىندا اندەنەلەردىڭ ءتۇزىلۋى تەكسەرىلەدى. بۇعان دەيىن ەلدىڭ دەنساۋلىق ساقتاۋ ءمينيسترى وتاندىق پرەپاراتتىڭ الداعى كوكتەمگە دەيىن دايىن بولارىنا سەنىم بىلدىرگەن ەدى. جالپى قازىر يراندا تاعى ءۇش ۆاكتسينا ازىرلەنىپ جاتىر. ولار كەلەردىڭ سوڭىنا قاراي كلينيكالىق سىناقتارعا جىبەرىلۋى ءتيىس.

قازاقستانداعى احۋال دا ءماز ەمەس. وتكەن تاۋلىكتە ەلدە كوروناۆيرۋس جۇققانى تەستپەن دالەلدەنگەن 777 ادام انىقتالدى، 159 ادام كوروناۆيرۋس پنەۆمونياسىنا شالدىققان. پتر-تەست كوروناۆيرۋس بارىن كورسەتكەن 7 ادام، كوروناۆيرۋس پنەۆمونياسىنان 2 ادام قايتىس بولعان.

قازاقستان 1 تامىزدان بەرى كلينيكالىق بەلگىلەرى كوروناۆيرۋسقا ۇقساس پنەۆمونياعا ارنايى كود بەرىپ، جالپى پنەۆمونياعا شالدىققانداردان بولەك ەسەپتەپ كەلەدى. سودان بەرى 43 498 ادامعا كوروناۆيرۋس پنەۆمونياسى دياگنوزى قويىلعان. 4 ايدان اسا ۋاقىت ارالىعىندا 458 ادام قايتىس بولعان. 31 مىڭنان استامى جازىلعان.

ددسۇ-نىڭ دەرەگىنشە، الەمدە كوروناۆيرۋسقا قارسى 212 ۆاكتسينا-كانديدات زەرتتەۋ جۇرىگىزىپ جاتىر. ونىڭ تەك 48-ءى كلينيكالىق سىناق ساتىسىندا. بۇعان ءبىلىم جانە عىلىم مينيسترلىگىنىڭ بيوقاۋىپسىزدىك ماسەلەلەرى جونىندەگى عزي ازىرلەپ جاتقان قازاقستاندىق QazCovid-in ەكپەسى دە ەنگەن.

"The Qazaq Times"