بەيجىڭگە نارازىلىق: جاپون-قىتاي اۋماقتىق داۋى كۇشەيە ءتۇستى

جاپونيا ۇكىمەتى توكيو مەن بەيجىڭ اراسىنداعى اۋماقتىق داۋ-دامايدىڭ تاقىرىبى سانالاتىن سەنكاكۋ (دياويۋداو) ارالدارىندا قىتاي پاترۋلدىك كەمەلەرىنىڭ پايدا بولۋىنا بايلانىستى قىتاي بيلىگىنە نارازىلىق ءبىلدىردى. بۇل تۋرالى تۇراقتى ءباسپاسوز ءماسليحاتىندا جاپونيا مينيسترلەر كابينەتىنىڭ باس حاتشىسى كاتسۋنوبۋ كاتو مالىمدەدى.

جاپونيا قحر باسشىلىعىنىڭ شىعىس قىتاي تەڭىزىندەگى داۋلى ارالدار ماڭىنداعى اسكەري قيمىلىن كۇشەيتكەنىنە الاڭدايدى. وسىعان بايلانىستى جاپون پرەمەر-ءمينيسترى قىتايدان اسكەري ارانداتۋشىلىقتى توقتاتۋىن تالاپ ەتكەن. ال قىتاي سەنكاكۋ (دياويۋيداۋ) ارالدارى ءوز تەررويتورياسى ەكەنىن العا تارتىپ وتىر. وسىعان بايلانىستى مينيسترلەر كابينەتىنىڭ باس حاتشىسى جاپونيا بيلىگى سەنكاكۋ ارالدارى ايماعىنداعى جاعدايدى باقىلاۋ ءۇشىن بار كۇشىن سالاتىنىن اتاپ ءوتتى.

2012 جىلدىڭ قىركۇيەگىندە توكيو سەنكاكۋ ارالدارىن جەكە مەنشىك يەلەرىنەن ساتىپ الۋ تۋرالى جاريالاعاننان كەيىن جاپون-قىتاي اراسىنداعى اۋماقتىق داۋ كۇشەيە ءتۇستى. وسىدان كەيىن قحر-دا جاپونياعا قارسى بىرنەشە مارتە دەمونستراتسيالار ءوتتى. سودان بەرى قىتاي كەمەلەرى ۇنەمى سەنكاكۋ ارالدارىندا جۇرەدى.

1985 جىلى يمپەريالىق قىتايمەن سوعىستا جەڭىسكە جەتكەن سوڭ، سەنكاكۋ ارالدارى مەن تايۋان جاپونيا قۇرامىنا قوسىلدى. ەكىنشى دۇنيەجۇزىلىك سوعىستا جەڭىلگەننەن كەيىن توكيو تايۋانعا باسشىلىق ەتۋ قۇقىعىنان باس تارتتى. رەسمي بەيجىڭ سەنكاكۋ ارالدارىن دا يەلەنگىسى كەلەدى. الايدا، جاپونيا ۇكىمەتى بۇل ارالدار سوڭعىس ناتيجەسىندە اننەكسيالانبادى دەيدى.

ەكى ەل دە سەنكاكۋ ارالدارىنىڭ ەگەمەندىگىن تالاپ ەتەدى. دەگەنمەن تاراپتار بۇرىننان بەرى ورتاق شەشىمگە كەلە الماعان. جاپونيا بيىل ماۋسىمدا سەنكاكۋ ارالدارىنىڭ اكىمشىلىك وكرۋگىن «توننودجو سەنكاكۋ» دەپ وزگەرتۋ تۋرالى قارار قابىلدادى. ال بەيجىڭ تاراپى اتالعان قۇجاتتى قىتايدىڭ ايماقتىق ەگەمەندىگىنە جاسالعان ارانداتۋشىلىق رەتىندە قابىلداپ، قۇجاتتى زاڭسىز دەپ تانىعان. سونىمەن قاتار قىتاي سەنكاكۋ ارالدارىن وزىنە تيەسىلى دەپ مالىمدەگەن.

"The Qazaq Times"