ۇلىبريتانيادا كوروناۆيرۋس جۇقتىرعاندار سانى 1 ميلليوننان استى. ۆيرۋستىڭ الدىن الۋ ءۇشىن ەلدىڭ باس سانيتار-دارىگەرى روجدەستۆونى ەڭ جاقىن ادامدارمەن عانا قارسى الۋعا شاقىردى.

بريتانيا پرەمەر-ءمينيسترى بوريس دجونسون: «كوكتەمدە ەلىمىزدە كوروناۆيرۋسقا قارسى ۆاكتسينا سالۋ ناۋقانى باستالىپ، تەست سانى كوبەيگەندە شەكتەۋ شارالارى جايلى ۇمىتامىز. الايدا وعان دەيىن ءالى كوپ ۋاقىت بار. الدا قىس كەلەدى. كۇن سۋىتقاندا ءتۇرلى اۋرۋلار ءورشىپ كەتەتىنىن بىلەمىز. سوندىقتان كوكتەمگە دەيىن ءبىزدى قيىن كەزەڭ كۇتىپ تۇر»، – دەيدى.

5 قاراشادا جالپىۇلتتىق لوكداۋن جاريالانعان. ول 2 جەلتوقسانعا دەيىن جالعاسادى. كەلەسى ايدىڭ باسىندا لوكداۋن اياقتالىپ، تەك ۆيرۋس ءورشىپ تۇرعان ايماقتاردا جەرگىلىكتى كارانتين ەنگىزۋ جۇيەسى كۇشىنە ەنەدى. بيلىك روجدەستۆولىق مەرەكەگە وراي 23-27 جەلتوقسان ارالىعىندا شەكتەۋ شارالارىنىڭ جەڭىلدەتىلەتىنىن مالىمدەدى.

جاڭا تارتىپكە ساي ءبىر ۇيدە تۇرمايتىن ادامداردىڭ كەزدەسۋىنە تىيىم سالىنادى; كوشەدە 6 ادامنان ارتىق جينالۋعا بولمايدى. سونىمەن قاتار بريتانيا بيلىگى قوعامدىق كولىكتەردىڭ ورنىنا ۆەلوسيپەد، ەلەكتروساموكاتتى پايدالانۋعا جانە الىس ساپارعا شىقپاۋعا كەڭەس بەردى. ازىق-تۇلىك دۇكەندەرى مەن ءدارىحانالاردان باسقا نىساندار ۋاقىتشا جابىلادى. ۇكىمەت كارانتين سوڭىنا دەيىن ەڭبەكاقىسىز قالعاندارعا جالاقىلارىنىڭ 80%-ىن تولەۋدى جالعاستىرماق. ەگەر جاعداي تۇزەلسە، لوكداۋننان كەيىن بريتانيالىقتار 25 جەلتوقساندا تويلاناتىن كاتوليكتەردىڭ روجدەستۆوسىن وتباسىلارىمەن بىرگە اتاپ وتپەك.

قازىر الەمدە ەكى ۆاكتسينا كلينيكالىق سىناقتىڭ سوڭعى ءۇشىنشى فازاسىن اياقتاعان. قازىر باسقا ون ەكپە سىناقتىڭ سوڭعى كەزەڭىنەن وتكىزىلىپ جاتىر. سىناقتان ءساتتى ءوتىپ، كوروناۆيرۋستى ەمدەۋدە 90%-دان ارتىق دالدىك كورسەتكەن ۆاكتسينالار قاتارىندا Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسى بار. امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان استام وڭ ناتيجە كورسەتكەن.

"The Qazaq Times"