اقش-تا بيۋللەتەندەردى ساناۋ ءالى دە جۇرگىزىلىپ جاتىر. ازىرگە، رەسپۋبليكاشىل دونالد ترامپ 214, ال دەموكرات دجو بايدەن 264 داۋىس ناتيجە كورسەتكەن.

قازىر بارلىق نازار نەۆادا، سولتۇستىك كارولينا، اريزونا، ۆيسكونسين، دجوردجيا جانە ميچيگانداعى ساناق بارىسىنا اۋدارىلعان. سەبەبى دجو بايدەن دە دونالد ترامپ تا اتالعان شتاتتاردا ءبىر-بىرىنەن اسا الشاقتاي قويماعان.

ميچيگان مەن ۆيسكونسيندە ءسال باسىمدىققا يە بولىپ تۇرعان دجو بايدەن ءۇشىن نەۆادا مەن اريزونا شتاتىندا قاجەتتى ۇپاي جيناۋ جەڭىسكە اكەلۋى مۇمكىن. الايدا دونالد ترامپ كەي شتاتتاردا زاڭبۇزۋشىلىقتاردىڭ بولعانىن العا تارتىپ، ءوزىنىڭ جەڭىسكە جەتەتىنىن ايتۋدا.

ال اتالعان شتاتتاردىڭ كەيبىرىندە ساناق ءالى بىرنەشە كۇنگە جالعاسۋى مۇمكىن. پەنسيلۆانيا مەن اريزونا بيلىگى بيۋللەتەندەردى ساناۋ بۇگىن اياقتالۋى مۇمكىن. ال نەۆادا قاراشانىڭ 12-ءى كۇنى، دجوردجيا زاڭ بويىنشا سايلاۋدان كەيىن 10 كۇننىڭ ىشىندە جاريالاۋى ءتيىس.

امەريكاداعى سايلاۋ جۇيەسىنىڭ وزىندىك ەرەكشەلىكتەرى بار. حالىق پرەزيدەنتتى تىكەلەي سايلامايدى. ياعني «ءبىر ادام – ءبىر داۋىس» ەرەجەسى قولدانىلمايدى. اق ءۇي باسشىسىن تاڭداۋشىلار كوللەگياسىنىڭ مۇشەلەرى انىقتايدى. ولاردىڭ جالپى سانى – 538. ءار شتاتتىڭ حالىق سانىنا سايكەس ىرىكتەلەدى. ۇمىتكەردىڭ قايسىسى بولماسىن، بەلگىلى ءبىر شتاتتا جەڭىسكە جەتسە، وسى شتات تاڭداۋشىلارىنىڭ بارلىعى سول ۇمىتكەر ءۇشىن داۋىستارىن بەرۋگە ءتيىس.

بۇل ەرەجە تەك شاعىن مەن جانە نەبراسكا شتاتتارىندا قولدانىلمايدى. جەڭىسكە جەتۋ ءۇشىن ۇمىتكەر 538 داۋىستىڭ كەم دەگەندە ەكى ءجۇز جەتپىسىن جيناۋى قاجەت. سوندىقتان كەيدە حالىقتىڭ كوپشىلىگى داۋىس بەرگەن ۇمىتكەر پرەزيدەنتتىك ورنىنان قاعىلۋى مۇمكىن. سوڭعى سايلاۋدا تاپ وسىنداي جاعداي تىركەلگەن ەدى. حيللاري كلينتون كوپ داۋىس جيناعانىمەن، شتاتتار تاڭداۋشىلارىنىڭ داۋىستارى بويىنشا ارتتا قالدى. سىرتتان بۇل جۇيە تىم كۇردەلى كورىنۋى مۇمكىن. الايدا اقش دەربەس شتاتتار وداعى رەتىندە قۇرىلعانىن ەسكەرۋى كەرەك. ياعني ءىس جۇزىندە فەدەراتسيا باسشىسى سايلانادى.

"The Qazaq Times"