ترامپ: بايدەن جەڭىلگەنىن مويىنداۋى كەرەك

اقش پرەزيدەنتى دونالد ترامپ ايقىن باسىمدىقپەن جەڭىسكە جەتەتىنىن جانە قارسىلاسى دجوزەف بايدەننىڭ بۇل ناتيجەنى مويىنداعىسى كەلمەيتىنىن ايتتى. قازىرگى پرەزيدەنتتىڭ ۇندەۋى بارلىق امەريكالىق باق-تا تىكەلەي ەفيردە كورسەتىلدى.

اق ۇيدە مالىمدەمە جاساعان ترامپ: «دەموكراتتار بايدەننىڭ جەڭىلگەنىن مويىنداماي وتىر. بۇل – ەلىمىز ءۇشىن ۇيات. ءبىز وسى سايلاۋدا جەڭىسكە جەتەمىز دەپ دايىندالدىق. شىنى كەرەك، سايلاۋدا جەڭدىك. رەسپۋبليكاشىلداردىڭ ماقساتى – ەلدىڭ يگىلىگى ءۇشىن سايلاۋ ناتيجەلەرىنىڭ تۇتاستىعىنا كەپىلدىك بەرۋ. بۇل وتە ماڭىزدى ءسات»، – دەدى.

ترامپتىڭ ايتۋىنشا، دجوزەف بايدەن پرەزيدەنتتىك سايلاۋدا جەڭە المايتىنىن ءتۇسىنىپ، سوت ءىسىن جۇرگىزۋ ارقىلى ارەكەت ەتۋگە شەشىم قابىلداعان. سونىمەن قاتار «سايلاۋداعى داۋىستاردى ساناۋ ترامپتىڭ جەڭىسىن مويىنداماۋ ءۇشىن جاساندى تۇردە توقتاتىلدى» – دەيدى.

قازىرگى پرەزيدەنت دجوردجيا، پەنسيلۆانيا، ميچيگان جانە ۆيسكونسين شتاتتارىندا جەڭەتىنىنە سەنىمدى. ازىرگە، بۇل شتاتتاردا جەڭىمپاز انىقتالعان جوق. «Fox News» تەلەارناسىنىڭ باعالاۋى بويىنشا، ترامپ جوعارىدا اتالعان شتاتتاردا دا جەڭىسكە جەتەدى.

امەريكالىقتار بۇگىن تەك اق ءۇي باسشىسىن عانا ەمەس، ۆيتسە-پرەزيدەنتتى، وكىلدەر پالاتاسىنىڭ بۇكىل 435 مۇشەسىن، 35 سەناتور جانە بىرنەشە شتات مەن ايماقتىڭ 13 باسشىسىن دا تاڭداۋى ءتيىس. دەگەنمەن الەم نازارى پرەزيدەنت سايلاۋىنا اۋىپ وتىر. ءدال قازىر 538 سايلاۋشىنىڭ 238-ءى بايدەنگە، 213-ءى ترامپقا داۋىس بەرگەن. ۇمىتكەر پرەزيدەنت بولۋ ءۇشىن سايلاۋشىلار القاسىنداعى 538 داۋىستىڭ كەمىندە 270-ءىن الۋى كەرەك.

"The Qazaq Times"