پنەۆمونيانىڭ كوروناۆيرۋستان باسقا تۇرىمەن اۋىرعاندار سانى 339 مىڭنان استى. بۇل كورسەتكىش بىلتىر نەبارى 88,7 مىڭ بولعان. ال 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 110 مىڭعا جۋىقتاپ، 1 تامىزدان بەرگى كوروناۆيرۋس پنەۆمونياسى 36 مىڭنان اسقان.

بۇل تۋرالى دەنساۋلىق ساقتاۋ ۆيتسە-ءمينيسترى اجار عينياتقىزى QT رەداكتسياسىنا بەرگەن جاۋابىندا حابارلادى.

دەگەنمەن 340 مىڭعا ماڭايلاعان پنەۆمونيانىڭ 256 مىڭدايى قاڭتار-شىلدە ايلارىنىڭ ارالىعىندا تىركەلگەنىن ەسكەرسەك، ونىڭ اراسىندا كوروناۆيرۋستىق ءتۇرى بولۋى ابدەن مۇمكىن. سەبەبى 1 تامىزعا دەيىن قازاقستان بيلىگى كوروناۆيرۋس پنەۆمونياسىن جەكە سانات رەتىندە قاراستىرماعان. تەك ددسۇ مەن ازاماتتىق قوعام، باق وكىلدەرىنىڭ تالابىنان كەيىن عانا تامىزدان بەرى جاڭا فورماتتاعى U07.2 كودىمەن بەلگىلەي باستاعان.

دەنساۋلىق ساقتاۋ مينيسترلىگى قاتە بولجام جاساپ، كوكتەمگى كارانتين كەزىندە دايىندىقتى دۇرىس جۇرگىزبەۋى سەبەپتى مودەراتور-ۆەدومستۆو رەتىندە «ماۋسىم-شىلدە قىرعىنىنا» جول بەرىپ العان. سالدارىنان الەۋمەتتىك جەلىلەر نەكرولوگ جازاتىن پلاتفورماعا اينالعانى ەلدىڭ ەسىندە. ءدارى-دارمەك قات بولىپ، ءدارىحانالاردىڭ الدىندا ۇزىن-سونار كەزەك قاپتاعان. مەديتسينا ماماندارى تۇگىلى جەدەل جاردەم بريگاداسى جەتىسپەپ ەدى. بۇعان ۇكىمەت كوبىنە ەلدى جازعىرىپ، ءوزىنىڭ ۇيىمداستىرۋشىلىق جاعىنان كەتكەن كەمشىلىكتەرى تۋرالى از ايتتى. ءتىپتى پرەزيدەنت توقاەۆ ەل نارازىلىعى ۇدەگەن شاقتا ۇكىمەت پەن مينيسترلىكتىڭ قىزمەتىندە ورەسكەل قاتەلىكتەر كەتكەنىن باتىرا ايتقانداي بولعان. بىراق تاۋەلسىزدىك العالى ەل باسىنان وتكەرمەگەن قيىن-قىستاۋ شاققا جول بەرگەن جاۋاپتى شەنەۋنىكتەردىڭ ەشبىرى ءالى كۇنگە دەيىن جاۋاپقا تارتىلعان جوق.

2019 جانە 2020 جىلدارى 1 قاڭتار مەن 30 قىركۇيەك ارالىعىنداعى اۋرۋلاردىڭ حالىقارالىق جىكتەلىمىندە J12-18 كودتارىمەن بەلگىلەنەتىن پنەۆمونيانىڭ بارلىق تۇرىنە (مۇنىڭ اراسىندا U07.2 كودى ارقىلى بەلگىلەنەتىن كوروناۆيرۋس پنەۆمونياسى بولۋ ىقتيمالدىعى وتە جوعارى – QT) شالدىققان جانە قايتقان قازاقستاندىقتاردىڭ سانى ويلاندىرماي قويمايدى.

ۆيتسە-ءمينيستردىڭ مالىمەتىنشە, پنەۆمونيادان ماۋسىم ايىندا 628, شىلدەدە 2 149 ادام ومىردەن وتكەن. بۇل بىلتىرعا قاراعاندا 2,2-دەن (ماۋسىم) 8,4 ەسەگە (شىلدە) دەيىن ارتىق. COVID ىندەتى شىققالى بەرى قاڭتار-شىلدە ارالىعىندا قازاقستاندا 256 مىڭداي ادام پنەۆمونيامەن اۋىرعان، ونىڭ 4 مىڭعا جۋىعى قايتىس بولعان.

ال تسويدىڭ قازاقشاعا جۇيرىك جالعىز ورىنباسارى ءارى ەسكى تانىسى اجار عينياتقىزى ۇسىنعان دەرەككە كوز جۇگىرتسەك، بيىل العاشقى 9 ايدا پنەۆمونيادان 4 540 كوز جۇمعان. ال 2019 جىلى قاڭتار-قىركۇيەك ارالىعىندا بۇل 2,5 مىڭعا تارتا شامادا بولعان. بيىلعى ەسەپكە تامىز بەن قىركۇيەك ايلارىنداعى كوروناۆيرۋس پنەۆمونياسىنان قايتقان 355 جاعدايدى بىرىكتىرسەك، جالپى ءولىم كورسەتكىشى 4 895-گە جەتەدى.

سونىمەن قوسا، توعىز ايداعى (قاڭتار-قىركۇيەك) ەسەپكە سايكەس، 339 148 ناۋقاس اۋىرسا، بىلتىر 88 776 جان سىرقاتتانعان. اراداعى ايىرماشىلىق 4 ەسەگە جۋىق.

ددسۇ وكىلى مايكل رايان 11 شىلدە كۇنى قازاقستاندا كۇرت ورشىگەن پنەۆمونيانى تىكەلەي كوروناۆيرۋسپەن بايلانىستى ەكەنى جونىندە تۇسىندىرمە بەرگەن. ءتىپتى ايدىڭ ورتاسىندا مينيسترلىككە (باسقا جىلدان ەرەك قارقىنداعى) پنەۆمونيا مەن كوروناۆيرۋستى بىرىكتىرۋ جونىندە نۇسقاۋ جاساپ، كودىن بەلگىلەگەن. وسىعان قاراماستان بيلىك ىندەت قارقىنى باسىلعانعا، تامىز ايىنىڭ باسىنا دەيىن «دايىندىق كەزەڭىن» سىلتاۋراتىپ قوسپادى. مىڭداعان كەيستىڭ ەشبىرى كوروناۆيرۋستىڭ جالپى ستاتيستيكاسىنا ەنگىزىلمەدى. ساراپشىلاردىڭ 256 مىڭداي پنەۆمونيانىڭ اراسىنان كوروناۆيرۋستىق ءتۇرىن اجىراتۋعا بولاتىنى جونىندە تالاي رەت ايتسا دا، مينيستر الەكسەي تسوي كومانداسىمەن بىرگە «تەحنيكالىق جاعىنان قيىن» ەكەنىن العا تارتتى. تامىز-قازان ايلارىنىڭ ارالىعىندا دەرتتىڭ بەتى قايتقان كەزدە دە مينيسترلىك ادەتتەگىدەن 3,3 ەسەگە ارتىق پنەۆمونيا جاعدايىن  قايتا سۇزۋگە كوڭىل اۋدارمادى، ارەكەت ەتپەيدى. رەداكتسيا ءجۋرناليسىنىڭ سۇراعىنا ايتقان جاۋابىندا ۆيتسە-مينيستر اجار عينيات ۇكىمەتتىڭ بۇل ىستە قۇلىقسىز ەكەنىن ەكى مارتە كەسىمدى تۇردە مالىمدەگەن. بيلىكتىڭ بۇل ارەكەتى قوعام تارپىنان «ساياسي يميدج جولىنداعى وتىرىك»، «مانيپۋلياتسيا» دەگەن سىنعا ۇشىرادى.

پاندەمياداعى ءولىم ءوسىمىن راستايتىن ستاتيستيكا كوميتەتى 2018 جىلى ماۋسىم-شىلدەدە قازاقستاندا 21 809 ادام، 2019 جىلى وسى ۋاقىتتا 22 708 ادام، ال بيىل 43 127 ادام قايتىس بولعانىن جاريالادى. رەسمي دەرەككە ساي، پاندەميا داۋىرىندەگى «ماۋسىم-شىلدە قىرعىنىندا» قايتقاندار بىلتىرعا قاراعاندا 20 419 ادامعا كوبىرەك بولعان. دەگەنمەن قازاقستان ۇكىمەتى مۇنىڭ سەبەبىن تۇسىندىرمەدى.

30 قىركۇيەكتەگى رەسمي ەسەپ بويىنشا، كۆي- نەمەسە كوروناۆيرۋس پنەۆمونياسىنا شالدىققاندار سانى 32 979 سىرقات. دەمەك توعىز ايدا 372 127 ادامنىڭ پنەۆمونيادان  اۋىرعان. سونىمەن، قازاقستاندا بيىل كوروناۆيرۋس پەن ونىڭ باسقا دا تۇرلەرىن قوسا ەسەپتەگەندە كەمىندە 375,5 ادام پنەۆمونياعا شالدىققان. وكپە قابىنۋىنىڭ ونداعان ءتۇرى بار. بۇدان تىسقارى رەسمي تىركەلمەگەن نە اۋرۋىن سەزبەگەن حالدە وتكەرگەندەردى ەسكەرسەك، شىنايى جاعداي بۇدان الدەقايدا كوپ بولۋى مۇمكىن. ارينە، بۇل تىركەلمەگەندىكتەن، جاي عانا – گيپوتەزا.

"The Qazaq Times"