قازاقستان باس پروكۋراتۋراسى 7 ايدان اسا ۋاقىتتان سوڭ قاڭتار وقيعاسىناندا قازا تاپقانداردىڭ ءتىزىمىن جاريالادى. پروكۋراتۋرانىڭ 16 تامىزدا جاريالاعان تىزىمىندە 238 مارقۇمنىڭ فاميلياسى مەن ەسىمىنىڭ ينيتسيالى عانا جازىلعان. مارقۇمداردىڭ قالاي، قانداي جاعدايدا قازا تاپقانى جايلى اقپارات جوق، دەپ جازدى ورتالىق ازيا جاڭالىقتار قىزمەتى.

قوعام قاڭتار وقيعاسىنان كەيىن بيلىكتەن وپات بولعانداردىڭ ەسىمىن جاريالاۋدى تالاپ ەتىپ كەلگەن ەدى. ورگاندار تەرگەۋ قۇپيالىلىعىنا سىلتەپ وسى كۇنگە دەيىن مارقۇمداردىڭ ەسىمىن جاريالاماعان. بۇدان بولەك قۇقىق قورعاۋشىلار مەن قازا تاپقانداردىڭ جاقىندارى مارقۇمداردىڭ قانداي جاعدايدا قازا بولعانى جايلى اقپاراتتى تالاپ ەتكەن.

بيلىك قاڭتار وقيعاسىندا قازا تاپقانداردىڭ ءتىزىمىن جاريالاماي تۇرعاندا ازاتتىق راديوسى مارقۇمدار جايلى دەرەكتەردى جيناپ، "قاندى قاڭتار قۇرباندارى" دەگەن ارنايى جوباسىن جاريالاعان. ازاتتىق قاڭتار قىرعىنىندا قازا بولعان 202 ادامنىڭ اتى-ءجونىن جانە دەرەكتەرىن جيناعان.

قاڭتاردىڭ باسىندا ەلدە سۇيىلتىلعان گازدىڭ قىمباتتاۋىنا قارسى ميتينگ ءوتىپ، نارازىلىقتىڭ اياعى قانتوگىسكە ۇلاسقان. بيلىك شەتەلدە دايىندىقتان وتكەن "تەرروريستەر شابۋىلى" تۋرالى ايتتى، بىراق وعان دالەل-ايعاق كەلتىرگەن جوق. پرەزيدەنت قاسىم-جومارت توقاەۆ كۇشتىك قۇرىلىمعا ەسكەرتۋسىز وق اتۋعا بۇيرىق بەرگەنىن مالىمدەدى. ول سونىمەن بىرگە ەلدە بيلىكتى كۇشپەن باسىپ الۋ تالپىنىسى بولعانىن ايتتى، الايدا ونى كىم ۇيىمداستىرعانىن ناقتىلامادى.

رەسمي دەرەك بويىنشا، قاڭتار وقيعاسىندا 230 ادام قازا بولدى. بۇعان قوسا، وقيعا كەزىندە ۇستالعان تاعى سەگىز ادامنىڭ تەرگەۋ يزولياتورىندا كوز جۇمعانى بەلگىلى بولدى. بيلىك قوعام تالابىنا قاراماستان وپات بولعانداردىڭ ەسىمىن جاريالاماي كەلگەن ەدى. بۇدان بولەك قۇقىق قورعاۋشىلار مەن قازا تاپقانداردىڭ جاقىندارى مارقۇمداردىڭ قانداي جاعدايدا قازا بولعانى جايلى اقپاراتتى تالاپ ەتكەن.

قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم", "جاپپاي تارتىپسىزدىك ۇيىمداستىرۋ", "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، بىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.