الماتىدا 6 قازاننان باستاپ تەاترلاردىڭ جۇمىسى قايتا جاندانادى. الماتى قالاسىنىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس، مادەني مەكەمەلەردىڭ تەك جارتىسىنا عانا كىسى جايعاسا الادى.  

ناقتىراق ايتقاندا، تەاتر زالىنداعى كورەرمەندەرگە ارنالعان ورىننىڭ تەك 50%-ىنا الەۋمەتتىك قاشىقتىقتى ساقتاي وتىرىپ ادام وتىرۋعا رۇقسات ەتىلەدى. بۇدان اسپاۋى ءتيىس.

«مادەني نىسانداردا الەۋمەتتىك اراقاشىقتىق ساقتالۋى قاجەت. سونداي-اق، سانيتارلىق-دەزينفەكتسيالىق رەجيم، جەلدەتۋ جانە اۋانى باپتاۋ جۇيەلەرى ۇزدىكسىز جۇمىس ىستەپ تۇرۋى كەرەك. وعان قوسا، اۋانى ساۋلەلەندىرۋ (كۆارتس) ۇسىنىلادى»، – دەلىنگەن قاۋلىدا.

سونىمەن قاتار، قالادا ءدامحانالاردىڭ، كولىك جۋ-جوندەۋ ورىندارىنىڭ، ادامدارمەن بايلانىسى جوق رەجيمدە جۇمىس ىستەيتىن نىسانداردىڭ جۇمىس ۋاقىتى تاڭعى ساعات 10:00-دەن تۇنگى 00:00-گە دەيىن ۇزارتىلدى.

ەۋروپا ەلدەرى مەن وعان جاپسارلاس ۋكراينا، رەسەيدە پانەميا جاڭا قارقىن الا باستاعان. سايكەسىنشە اۋىرعان ناۋقاستار سانى كۇرت وسكەن. سول سەبەپتى كانادا, نيدەرلاندى، چەحيا, يسپانيا، شۆەتسيا، يتاليا، دانيا، گەرمانيا، گرەكيا، پورتۋگاليا جانە بەلگيا ءتارىزدى كوپتەگەن ەلدەردىڭ ءىرى قالالارىندا ءارتۇرلى دەڭگەيدە شەكتەۋ شارالارى كۇشەيىپ جاتىر.

"The Qazaq Times"