جاپونيا پرەمەر-ءمينيسترى ەسيحيدە سۋگا. فوتو: ۆۆس

War on rocks پورتالىنىڭ حابارلاۋىنشا، جاپونيا ۇكىمەتى قىتايعا سەنكاكۋ ارالدارىنا (دياويۋيدا ارالدارى) ارنالعان رەسمي سايتتى قىتايلىق تاراپتىڭ قۇرۋىنا بايلانىستى نارازىلىق بىلدىرگەن. رەسمي توكيو بەيجىڭنىڭ بۇل ارەكەتىن «حالىقارالىق زاڭعا قايشى» دەپ باعالادى.

ءباسپاسوز ماسليحاتىندا مينيسترلەر كابينەتىنىڭ باس حاتشىسى كاتسۋنوبۋ كاتو: «ءبىز ديپلوماتيالىق توپتار ارقىلى نارازىلىق ءبىلدىرىپ، سايتتى الىپ تاستاۋ تۋرالى تالاپ قويدىق. تاريحي جانە حالىقارالىق قۇقىققا سايكەس سەنكاكۋ ارالدارى جاپونيا اۋماعى ەكەنىن ەسكەرتەمىز»، –دەدى.

جاپونيا تاراپى ءدال وسى ماسەلە بويىنشا ماۋسىمدا قىتايعا نارازىلىق نوتاسىن جولداعان. جاپونيانىڭ شاعىمىنان كەيىن، اقش قىتايعا ەسكەرتۋ جاسادى. اقش مەملەكەتتىك دەپارتامەنتىنىڭ باسشىسى مايك پومپەو:«ءبىز قىتايدىڭ وڭتۇستىك قىتاي تەڭىزىن جەكە مەنشىك تەڭىز يمپەرياسى رەتىندە قاراستىرۋىنا جول بەرمەۋىمىز كەرەك. اقش ۇكىمەتى وسى ماسەلە بويىنشا مالىمدەمە جاسايدى»، – دەپ مالىمدەگەن.

ماۋسىمنىڭ باسىندا قىتاي ءسىم وكىلى چجاو ليتسزيان اقش بيلىگى بەيجىڭنىڭ اۋماقتىق داۋلارىنا ارالاسۋعا قۇقىعى جوق دەپ مالىمدەگەن. ديپلوماتتىڭ ايتۋىنشا، «بەيجىڭنىڭ وڭتۇستىك قىتاي تەڭىزىنە يەلىك ەتۋ قۇقىعى بار جانە ول تاريحي تۇردە قىتايدىڭ اۋماقتىق باقىلاۋىنا قارايدى».

25 ماۋسىمدا جاپونيا ۇكىمەتى شىعىس قىتاي تەڭىزىندەگى سەنكاكۋ (دياويۋداو) ارالدارىن «جەكەمەنشىكتەپ العان» قىتاي بيلىگىنە نارازىلىق بىلدىرگەن بولاتىن. توكيو مالىمدەمەسىندە: «سەنكاكۋ ارالدارى تاريحي جاعىنان دا، حالىقارالىق قۇقىق بويىنشا دا بىزگە تيەسىلى. قىتاي ءوز تەرريتورياسى رەتىندە جەكەمەنشىكتەپ الا المايدى. وسى رەتتە ءبىز قىتاي بيلىگىنە نارازىمىز»، – دەلىنگەن.

1895 جىلى يمپەريالىق قىتايمەن سوعىستا جەڭىسكە جەتكەن سوڭ، سەنكاكۋ ارالدارى مەن تايۋان جاپونيا قۇرامىنا قوسىلدى. ەكىنشى دۇنيەجۇزىلىك سوعىستا جەڭىلگەننەن كەيىن توكيو تايۋانعا باسشىلىق ەتۋ قۇقىعىنان باس تارتتى. رەسمي بەيجىڭ سەنكاكۋ ارالدارىن دا يەلەنگىسى كەلەدى. الايدا، جاپونيا ۇكىمەتى بۇل ارالدار سوعىس ناتيجەسىندە اننەكسيالانبادى دەيدى.

"The Qazaq Times"