بريۋسسەلدە ەۋرووداق ءسامميتى باستالدى. ەكى كۇنگە سوزىلعان جيىندا وداق باسشىلارى وسى باسقوسۋدا تۇركيا جانە قىتايمەن قارىم-قاتىناستارى، Brexit كەلىسىم، بەلارۋس پەن تاۋلى كاراباحتاعى جاعدايدى تالقىلادى.

جيىندا بەلارۋسكە قارسى سانكتسيالار ەنگىزۋ ماسەلەسى داۋ تۋعىزاتىن ءتۇرى بار. ويتكەنى كيپر مەملەكەتى ءوز اۋماعىنا تيەسىلى جەرورتا تەڭىزىندە گەولوگيالىق بارلاۋ جۇرگىزىپ جاتقان تۇركياعا دا سانكتسيالار سالىنۋى كەرەك دەپ سانايدى.

بۇل تاقىرىپقا قاتىستى مالىمدەمە جاساعان گەرمانيا كانتسلەرى انگەلا مەركەل: «ەۋرووداق گرەكيا مەن كيپردىڭ تۇركيامەن اراداعى داۋىن بەيبىت شەشۋگە نيەتتى. تۇركيامەن جان-جاقتى قاتىناس ورناعان. سولتۇستىك اتلانتيكا قورعانىس ۇيىمىنداعى وداقتاسىمىز. قيىندىعىنا قاراماستان، سىندارلى قاتىناستاردى دامىتۋ قاجەت. سونداي-اق قورشاعان ورتانى قورعاۋ بويىنشا قىتايمەن ىنتىماقتاستىعىمىز جانە بۇل ەلمەن ينۆەستيتسيالىق كەلىسىم باستى نازاردا بولادى. الداعى ايلاردا بۇل جونىندە شيراتا تۇسپەكپىز. تاۋلى كاراباحتا جارالانعان فرانتسۋز تىلشىلەرىن ەلىنە تەزىرەك قايتارۋ ءۇشىن قولدان كەلگەنىن جاساپ جاتىرمىز. سانيتارلىق ۇشاق ولاردى الىپ كەتۋگە دايىن تۇر»، – دەدى.

وسى اپتادا فرانتسيا پرەزيدەنتى ەممانۋەل ماكرون اق ءۇي باسشىسى ترامپ جانە رەسەي پەرزيدەنتى پۋتينمەن تاۋلى كاراباقتاعى جاعدايدى تالقىلاعان. فرانتسيا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ مينسك توبىنا مۇشە ەل رەتىندە ەشبىر شارت قويماي، اتىستى دوعارۋدى تالاپ ەتىپ وتىر.

"The Qazaq Times"