كورنەكى سۋرەت. فوتو: team29.org

سىبايلاس جەمقورلىققا قارسى ءىس-قيمىل اگەنتتىگىنىڭ قۇرامىنداعى ءبىرىنشى دەپارتامەنت تەرگەۋشىسى دانيار بەكايداروۆ باعىنىشتى قىزمەتكەردىڭ جەمقورلىعى ءۇشىن باسشىلارىن وستاۆكاعا جىبەرۋ ينستيتۋتىگىڭ جۇمىسى تۋرالى باياندادى. 

«تىكەلەي باعىنىشتى قىزمەتكەرلەردىڭ جەمقورلىق ايىبى بويىنشا باسشىلاردىڭ جاۋاپكەرشىلىگى ينستيتۋتى نورماتيۆتىك تۇرعىدا رەتتەلدى. ول بيىلعى جىلدىڭ 9 ايىندا وزىندە ءتيىمدى قۇرال ەكەنىن دالەلدەدى. ساياسي باسشىلاردىڭ وتستاۆكاعا كەتۋىنە قاتىستى قاراستىرىلىپ وتىرعان كەزەڭدە اۋداندىق جانە وبلىستىق دەڭگەيدەگى 9 اكىم وتستاۆكاعا كەتۋ تۋرالى ءوتىنىش بەردى، 6 اكىم جۇمىستان شىعارىلدى»، – دەدى ول بريفينگ بارىسىندا.

ماسەلەن، ساتباەۆ قالاسىنىڭ اكىمى ىدىرىسوۆتىڭ جانە الماتى وبلىسى پانفيلوۆ اۋدانى اكىمى ومىراليەۆتىڭ وتستاۆكا تۋرالى ءوتىنىشى جەتەكشىلىك تاراپتان  ماقۇلدانباعان. وبلىس اكىمدەرى ولارعا «سوگىس» جاريالادى. قاراماعىنداعى قىزمەتكەرلەرى جەمقورلىق قىلمىستى وزگەرىستى ەنگىزۋگە دەيىن (2019 جىلعى 10 جەلتوقسان) جاساعاندىقتان، ساتباەۆ قالاسىنىڭ اكىمى وتستاۆكاعا ءوتىنىش بەرمەۋىنە دە بولار ەدى.

«28 قىركۇيەكتە قوستاناي وبلىسى رۋدنىي قالاسىنىڭ اكىمى عايازوۆ وتستاۆكاعا كەتتى. ول بۇل قىزمەتتى 2011 جىلدان بەرى اتقارىپ كەلەدى. بۇعان دەيىن حابارلانعانداي (13 قىركۇيەك) وعان تىكەلەي باعىنىشتى رۋدنىي قالاسى قاشار كەنتىنىڭ اكىمى الدونعاروۆقا قاتىستى ۇكىم زاڭدى كۇشىنە ەنگەن بولاتىن. سول سەكىلدى اتىراۋ وبلىسى قۇرمانعازى اۋدانىنىڭ اكىمى نۇرتاەۆتىڭ وتستاۆكاعا كەتۋ تۋرالى ءوتىنىشى قارالۋدا. ونىڭ ورىنباسارى تاجىباەۆ سوتتالدى. 8 قىركۇيەكتە ونىڭ ورىنباسارى تاجىباەۆقا قاتىستى ۇكىم زاڭدى كۇشىنە ەندى. 5 ءىس ءالى مونيتورينگتە»، – دەدى بەكايداروۆ.

زاڭ كۇشىنە ەنگەنىمەن ءىرى كولەمدە جەمقورلىق كۇدىگىنە ىلىككە لاۋازىمدى تۇلعالار ءبارى بىردەي ورنىنان كەتە قويعان جوق. ساراپشىلار مەن ازاماتتىق قوعام بەلسەندىلەرى بۇل تەتىكتىڭ ومىرشەڭ ەمەستىگىن، جاي ويىن شارتىنا كونبەگەندەردى «تازالاۋعا» ارنالعان سۇزگى دەپ سانايدى. سايلاۋدى دا، پاراقور ورىنباسار ءۇشىن قىزمەتىنەن بوساتۋ دا ازىرگە تەك اۋىل-اۋدان اكىمدەرىنە عانا «قولدانىلىپ» جاتىر.

“The Qazaq Times”