الەكسەي تسوي ايتقان دەرەكتەر: بۇگىنگى احۋال جانە دەنمين دايىندىعى

ارادا ەكى ايداي ۋاقىت وتكەن سوڭ 1 قازان كۇنى دەنساۋلىق ساقتاۋ ءمينيسترى ورتالىق كوممۋنيكاتسيالار قىزمەتىندە الەكسەي تسوي ورىسشا مەن ۆيتسە-مينيستر اجار عينيات قازاق تىلىندە تىلشىلەردىڭ الدىندا ارنايى مالىمدەمە جاسادى.  

دەنساۋلىق ساقتاۋ ۆيتسە-ءمينيسترى اجار عينيات كەيىنگى ەكى ايدا (تامىز-قىركۇيەك) جرۆي-مەن تىركەلگەندەر سانى بىلتىرعا قاراعاندا 25%-عا تومەندەگەنىن مالىمدەدى. ونىڭ دەرەگىنشە، بيىل تامىزدا 154 533 (بىلتىر تامىزدا 193 465), قىركۇيەكتە 263 775 (بىلتىر قىركۇيەكتە 378 267) جاعداي تىركەلگەن.

ءمينيستردىڭ ەسكى ارىپتەسى، «ماۋسىم-شىلدە قىرعىنىنىڭ» ءدال ورتاسىندا تاعايىندالعان عينيات  بۇگىنگى تاڭدا ەلدە 1955 مەكەمە بارىن، ونىڭ ىشىندە 577 ەمحانا جۇمىس ىستەپ جاتقانىن ايتادى.

دەنساۋلىق ساقتاۋ ۆيتسە-ءمينيسترى اجار عينيات. 2020 جىل 1 قازان. فوتو: قر وكق

دەنمين باسشىلىعى ەمحانالاردا قىزمەتكەرلەر مەن پاتسيەنتتەرگە جاعداي جاساۋعا ءسوز بەردى. ەندى اۋرۋحانالاردا الەۋمەتتىك قاشىقتىقتى ساقتاۋعا ارنالعان بەلگىلەر قويىلىپ،  ۆيرۋستىڭ بار-جوعىنا بايلانىستى لاس جانە تازا ايماقتارعا بولىنەدى.مەدقىزمەتكەرلەر تەرمومەترلەرمەن جانە ارنايى قورعانىش كيىمدەرىمەن قامتاماسىز ەتىلۋى ءتيىس. سونداي-اق، كورىنەتىن جەرلەردە كەلۋشىلەر مەن قارالۋشىلارعا ارنالعان سانيتارلىق تازارتقىشتار ورناتىلادى. COVID-19 كۇدىگى بار ناۋقاستار بولەك بولىمشەلەردە ەمدەلەتىن بولادى.

امبۋلاتوريالىق-ەمحانالىق ناۋقاستاردا تىنىس الۋ جەتىسپەۋشىلىگىن ەرتە انىقتاۋ ءۇشىن ەمحانالارعا 25,5 مىڭ يمپۋلستىك وكسيمەتر بەرىلەدى، 3640 ءموبيلدى توپ قاۋىپتى سانالاتىن سانات بويىنشا قىزمەت ەتۋدى جالعاستىرادى. 550 جەدەل جاردەم توبى حالىقتىڭ 4 ساناتىنا قىزمەت كورسەتۋدە.

جوسپارلى قابىلداۋ ءتارتىبى بويىنشا الدىن الا جازىلۋ ارقىلى جۇزەگە اسىرىلادى. باسقا-باسقا تاپ قازىرگى جاعدايدا Call-ورتالىعى، كونسۋلتاتيۆتى ورتالىقتار ۇزدىكسىز جۇمىس ىستەۋى كەرەك.

كۇزگى-قىسقى ەپيدماۋسىمدا تۇماۋدىڭ الدىن الۋ ماقساتىندا ازىرگە ەمحانالاردا اۋرۋى ىقتيمال 931 ملن ادامعا ۆاكتسينا ەگىلگەن. بۇل جالپى تۇماۋعا قارسى ۆاكتسينانىڭ 2,2 ميلليوننان استام دوزاسىنىڭ 44%-ى. ءالى جالعاسىپ جاتىر. الەۋمەتتىك وسال توپتاردان وزگە ساناتتاعى ازاماتتار اقىلى تۇردە سالدىرا الادى.

دەنمين-ءنىڭ قازاقشا سويلەي المايتىن باسشىسى الەكسەي تسويعا باياندامانىڭ مەملەكەتتىك تىلدەگى نۇسقاسىن مۇدىرمەي وقىپ بەرەتىن اجار عينيات ۇنەمى «كومەكتەسەدى». 2020 جىل 1 قازان. فوتو: قر وكق

ۆيتسە-مينيستر «220 مىڭ جۇكتى ايەلدىڭ 49 مىڭعا جۋىعى، ياعني 22% ۆاكتسيناتسيادان وتكەن، كەم دەگەندە 40% جۇكتى ايەلدەردى ۆاكتسيناتسيالاۋ جوسپارلانعان» دەيدى.

دەنمين كۇزگى ىقتيمال تولقىندا جرۆي، تۇماۋ جانە كوروناۆيرۋستى ورشىتپەس ءۇشىن 1 ملن ادامعا امبۋلاتوريالىق ءدارى-دارمەك تىزىمىنە سايكەس جرۆي اۋرۋلارىن ەمدەيتىن 5 ءدارى (انتيبيوتيكتار، قىزۋدى باساتىن دارىلەر), قوسىمشا كوروناۆيرۋسقا قارسى 5 ءدارى قورىن دايىنداپتى.

مينيستر مەن ۆيتسە-ءمينيستردىڭ سوزىنە قاراعاندا، كەز كەلگەن پاتسيەنت اۋرۋحاناعا كەدەرگىسىز جاتقىزىلۋى ءۇشىن بۇگىن جۇقپالى اۋرۋلارعا ارنالعان 14 مىڭنان استام توسەك-ورىن، ونىڭ ىشىندە 1142 (تولىق جابدىقتالعان) رەانيماتسيالىق توسەك-ورىن ازىرلەنگەن. قازىرگى تاڭدا جۇقپالى اۋرۋلار اۋرۋحانالارىنىڭ جۇكتەمەسى 12%. بۇدان بىلاي، جرۆي، تۇماۋ جانە  كوروناۆيرۋس بولۋى مۇمكىن بارلىق ناۋقاستار جۇقپالى اۋرۋلار اۋرۋحاناسىنا جاتقىزىلماق.

كۇزگى تولقىنعا دايىندىق رەجيمىندە قازىر 51 مىڭ توسەك قاراستىرىلعان. مۇنىڭ 5,5 مىڭى رەانيماتسيالىق توسەك، ال 4 مىڭى ءوججا-مەن جابدىقتالعان. قىركۇيەك ايىندا 1,2 مىڭ وكپەنى جاساندى جەلدەتۋ اپپاراتى ساتىپ الىنعان. جانە 22 مىڭ توسەك-ورىن وتتەگى قورىمەن قامتاماسىز ەتىلگەن.

ناۋقاستىڭ قاتار نە سوزىلمالى اۋرۋىنىڭ اسقىنۋى، مەديتسينالىق كومەككە كەش جۇگىنۋى جانە ءوز بەتىنشە ەمدەلۋى سەبەپتى جاعدايى قيىنداپ، انەستەزيولوگيا، رەانيماتسيا جانە قارقىندى تەراپيا بولىمىنە اۋىستىرۋعا تۋرا كەلەتىن كورىنەدى. قازىرگى كەزدە جۇزگە تارتا پاتسيەنت ينتەنسيۆتى بولىمشەدە ەمدەلىپ جاتىر.

ۆيتسە-مينيستر ءبىر ايداي بەرىلمەگەن ەسەبىن بايانداماسىندا جالعادى. ول:

– مەديتسينا مەكەمەلەرىنىڭ جۇمىسى جانە  جوسپارلى ستاتسيونارلىق كومەك تولىق قالپىنا كەلتىرىلدى. جەدەل جاردەم قىزمەتىنە قازىرگى ۋاقىتتا 1,4 مىڭ بريگادا جۇمىلدىرىلعان، مۇنىڭ ۇشتەن ءبىر بولىگى اۋىلداردا (498). كۇنىنە ورتا ەسەپپەن 17 مىڭ شاقىرۋ تۇسەدى، ونىڭ 3,6%-ى جوعارعى تىنىس جولدارىنىڭ ۆيرۋستىق ينفەكتسيا بەلگىلەرى بويىنشا تىركەلەدى. كوۆيدكە بايلانىستى شاقىرتۋ جاعدايى ايتارلىقتاي ازايدى. مىسالى، شىلدەدە كۇنىنە ورتاشا ەسەپپەن 3 مىڭ، تامىزدا 1 مىڭ، قىركۇيەكتە 500-700 قوڭىراۋ شالىندى، – دەيدى مينيستر ورىنباسارى.

جىلجىمالى مەديتسينالىق شاعىن «ەمحانا». فوتو: قر وكق

دەنمين «ماۋسىم-شىلدە قىرعىنان» كەيىن قوسىمشا 807 جەدەل جاردەم كولىگىن ساتىپ العان. تاعى 360 كولىك مەملەكەت تاراپىنان ساتىپ الىنادى.

قازىرگى كەزدە شالعاي جاتقان اۋىلداردا 49 جىلجىمالى مەديتسينالىق كولىك بار. مينيسترلىك مۇنىڭ جەتىسپەيتىنىن ايتادى. سوندىقتان «پرەزيدەنتتىڭ تاپسىرماسىمەن 100 جىلجىمالى مەديتسينالىق ەمحانا ساتىپ الىنادى. وندا تەراپەۆت، پەدياتر دارىگەرلەر پاتسيەنتتەردى قابىلدايدى جانە تولىق تەكسەرۋدەن وتكىزەدى. ءدارى-دارمەك جەتكىزۋ مۇمكىندىگى بار شاعىن-كلينيكادا COVID-19 انىقتاۋ بويىنشا بارلىق تەكسەرۋلەر جۇرگىزىلىپ، تالداۋلار الىنادى».

الەكسەي تسوي مەن اجار عينيات  سوز سوڭىندا ەل ازاماتتارىن سانيتارلىق تالاپتار مەن پروفيلاكتيكا ەرەجەسىن قاتاڭ ۇستانۋعا شاقىردى. مەديتسينالىق بەتپەردە تاعىپ، الەۋمەتتىك اراقاشىقتىقتى ساقتاپ، قولدى ءجيى سابىنداپ جۋىپ، ۇنەمى انتيسەپتيك قۇرالدارىن پايدالانۋ كەرەك.

*جوعارىدا كورسەتىلگەن دەرەكتەر مينيستر الەكسەي تسوي مەن ورىنباسارى اجار عينياتتىڭ رەسمي بايانداماسىنان الىنعان.

“The Qazaq Times”