كورنەكى سۋرەت. فوتو: اشىق دەرەككوز

28 قىركۇيەكتە ەلدە 58 ادامنان COVID-19 ينفەكتسياسى، 10 ادامنان كوروناۆيرۋس پنەۆمونياسى انىقتالدى. ءبىر كۇندە 4 ادام قايتىس بولعان. قازاقستاندا ناۋقاستانعانداردىڭ رەسمي ەسەبى 140 333-كە جەتتى. 

جارتى ايدان بەرى شىعىس قازاقستان وبلىسى كوۆيد تارالۋى بويىنشا ءبىرىنشى قاتاردا تۇر. دۇيسەنبى وڭىردە دا 21 كوروناۆيرۋس جاعدايى انىقتالعان. باسقا ايماقتاردا تاۋلىك ىشىندە تىركەلگەن كەيستەر سانى وننان اسپايدى. تۇركىستان، قىزىلوردا، ماڭعىستاۋ، جامبىل، اقتوبە وبلىستارىندا ەشبىر جاعداي تىركەلمەگەن.

قىركۇيەكتىڭ 28-ءسى كۇنگى ۇكىمەت دەرەگىنشە، 3 كىسى كوروناۆيرۋستان قايتقان. وتكەن كۇنى دەرتىنەن ايىققان 69 ادام اۋرۋحانادان شىقتى. ەمدەلىپ جاتقان 3,3 مىڭ ادامنىڭ 1906-سى اۋرۋحانالاردا، ال 1394 ناۋقاس امبۋلاتورلىق باقىلاۋدا. ولاردىڭ 46-سى وسكىنشەك بالا. سونداي-اق، جاعدايى اۋىر 92 ناۋقاس بار. ونىڭ 12-ءسى تىم اۋىر حالدە جاتىر. 21 ادام وكپەنى جاساندى جەلدەتۋ اپپاراتىنا قوسىلعان.

كوۆيدتىڭ اسقىنعان ءتۇرى كوروناۆيرۋس پنەۆمونياسىنا شالدىققان ءبىر ادامنىڭ جاعدايى وڭالماي، ومىردەن وتكەن. بىراق دەنساۋلىق ساقتاۋ مينيسترلىگى اۋرۋدىڭ كۇندەلىكتى كەيستەرىن ايماقتار بويىنشا جاريالامايدى. ايتپەسە، ەكى دەرتتىڭ ەتيولوگيا-كلينيكاسى ءبىر، ددسۇ ەكەۋىن بىرگە قاراستىرۋعا نۇسقايدى. دەگەنمەن ۆەدومستۆو ەكى دياگنوزدى الالاپ قارايدى.  كوروناۆيرۋس پنەۆمونياسىنا شالدىققاندار تۋرالى بيلىك تۇششىمدى اقپارات بەرمەيدى. ەشبىر رەسمي رەسۋرستا كوروناۆيرۋس سياقتى اۋىرعانداردىڭ سانى، ايماقتارداعى ۇلەسى، كلينيكالىق جاعدايى، جاس قۇرامى ينديكتارورلارى تۋرالى مۇلدەم جاريالانبايدى.

1 تامىزدان بەرى كوروناۆيرۋس پنەۆمونياسىنا شالدىققان  32,5 مىڭ ادامنىڭ 27 مىڭنان استامى جازىلعان. 13 ناۋرىزدان بەرى بيلىك مويىنداعان 107 833 ناۋقاستىڭ 102 805-ءى ايىققان.

ددسۇ مالىمەتىنشە، قازاقستاندا اۋىرعانداردىڭ سانى 140 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەپ كەلەدى.

پاندەميا باستالعالى جالپى جيىنى ۆيرۋس جۇققانداردىڭ 2 655-ءى  (كۆي+ / U07.1 – 1 728, كۆي- / U07.2 – 351, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

كوروناۆيرۋس دەرەگىندە، ءتىپتى كوروناۆيرۋس پنەۆمونياسىنان قايتقانداردىڭ سانىندا ايتارلىقتاي ايىرماشىلىق جوق. بىراق كوروناۆيرۋستى كۇندەلىكتى تىركەۋ تاجىريبەسى قالىپتاسقان قازاقستان ۇكىمەتى پنەۆمونياعا شالدىققانداردى ەسەپكە الۋدا «دەمالا قويادى». سەنبى مەن جەكسەنبى كۇنگى ايىرما – 6 ەسە. رەسمي دەرەككە قاراعاندا، 26 قىركۇيەك 229, 27-ءسى كۇنى 38, ال 28-ءى 10 ناۋقاس انىقتالعان. وسىعان قاراپ مينيسترلىك دەرەگى ءبىر ەمەس، ەكى كۇنگە كەشىگىپ تۇزىلەتىن ءتارىزدى. بۇل تۋرالى رەداكتسيا سۇراتاتىن بولادى. سەبەبى جەكسەنبىدەگى مالىمەتتىڭ كەمۋى اۋرۋحانالاردىڭ جۇمىس كۇنگى رەجيمدە بولماۋى سياقتى تەحنيكالىق ماسەلەدەن بولسا، دۇيسەنبى ءتىپتى ازايا قويۋى ەكىتالاي. كۇزگى تولقىنعا «تاس-ءتۇيىن، 100% دايىن» ەكەنىن سۇيىنشىلەي حابارلاعان مينيسترلىك كوروناۆيرۋس پنەۆمونياسى تۋرالى اقپاردى كەم-شەتىن جاريالايدى. پرەزيدەنت توقاەۆتىڭ تاپسىرماسى اياسىندا «اششى دا بولسا شىندىقتى ايتىپ، اقپاراتتى بىرىزدەندىرۋى» ءتيىس الەكسەي تسوي مەن ونىڭ كومەكشىسى باعدات قوجاحمەتوۆ ەكى اي بۇرىن قۇرىلعان اقپارات-مەديا ورتالىعىنىڭ جۇمىسىن ءالى كۇنگە دەيىن جولعا قويا الماي وتىر. ءتىپتى دەنمين وتكىر سۇراقتار قوياتىن ءتورتىنشى بيلىك سانالاتىن ءداستۇرلى باق-تان گورى الەۋمەتتىك جەلىدە تانىمال بلوگەرلەرمەن ارىپتەستىكتى ءبىرىنشى ورىنعا قوياتىنىن جاسىرمايدى.

"The Qazaq Times"