اقش يرانعا قارسى سانكتسيالار ءتىزىمىن كەڭەيتتى

اقش بيلىگى يرانعا باعىتتالعان سانكتسيالار ءتىزىمىن كەڭەيتىپ، وعان جەرگىلىكتى سۋديالار سەيەد ماحمۋد ساداتي مەن موحامماد ءسولتانيدى جانە شيراز قالاسىنداعى ءۇش تۇرمە جانە رەۆوليۋتسيالىق سوتتىڭ كەڭسەسىن قوستى. بۇل تۋرالى اقش قارجى مينيسترلىگىنىڭ سايتىندا حابارلاندى.

اقش مەملەكەتتىك حاتشىسى مايك پومپەونىڭ مالىمدەۋىنشە، تىزىمگە ەنگىزىلگەن ادامدار مەن قۇرىلىمداردىڭ يرانداعى ادام قۇقىقتارىن بۇزۋعا قاتىسى بار. مەملەكەتتىك دەپارتامەنتتىڭ ءباسپاسوز قىزمەتى تاراتقان مالىمدەمەدە: «بۇگىن اقش يراننىڭ بىرنەشە لاۋازىمدى تۇلعالارى مەن ۇيىمدارىنا ادام قۇقىقتارىن ورەسكەل بۇزعانى ءۇشىن سانكتسيالار ەنگىزدى. بۇدان باسقا اتالعان تۇلعالار ازاپتاۋ جانە ار-نامىستى قورلايتىن ءىس-ارەكەتتەرگە بارىپ، تۇرعىنداردى زاڭسىز جازالاعان»، – دەلىنگەن.

ۋاشينگتوننىڭ قاتاڭ قاۋلىسىنا ىلىككەن مەكەمەلەر شيراز، ۋرميا، مەشحەد قالالارىندا ورنالاسقان.

پومپەونىڭ ايتۋىنشا، سۋديا ساداتي مەن رەۆوليۋتسيالىق سوت شيرازعا ەنگىزىلگەن سانكتسيالار 27 جاستاعى پالۋان ناۆيد افكاريدىڭ ولىمىنە بايلانىستى ەنگىزىلگەن. «جاسىرىن تۇردە ورىندالعان ءولىم جازاسىنا دەيىن، پالۋان ناۆيد ابدەلاباد تۇرمەسىندە ازاپتالدى. ونى ءولىم جازاسىنا كەسۋ – ورەسكەل ارەكەت»، – دەدى.

يراننىڭ Fars اگەنتتىگى 12 قىركۇيەكتە 2018 جىلدىڭ قىركۇيەگىندە شيراز قالاسىندا كۇزەتشىنى ءولتىردى دەپ ايىپتالعان ناۆيد افكاريگە قاتىستى ءولىم ۇكىمىنىڭ ورىندالعانى تۋرالى حابارلاعان.

بۇعان دەيىن اقش پرەزيدەنتى دونالد ترامپ تەھراندى سوت تاعايىنداعان جازانى الىپ تاستاۋعا شاقىرىپ، «ناۆيد افكاريدى تۇتقىنداۋدىڭ ناقتى سەبەبى – ۇكىمەتكە قارسى دەمونستراتسياعا قاتىسۋ»، دەگەن پىكىر ءبىلدىردى. حالىقارالىق وليمپيادا كوميتەتىنىڭ (حوك) پرەزيدەنتى توماس باح يران پرەزيدەنتى حاسان رۋحانيگە پالۋاندى ءولىم جازاسىنا كەسپەۋ تۋرالى ءوتىنىش بىلدىرگەن. ۇكىم ورىندالعاننان كەيىن حوك پرەزيدەنتى الەمنىڭ تۇكپىر-تۇكپىرىنەن كەلگەن سپورتشىلار، يراننىڭ ۇلتتىق وليمپيادا كوميتەتى، بىرىككەن كۇرەس الەمى يران بيلىگىنىڭ «ادىلەتسىز ۇكىمىنە» قارسى جەڭىلىس تاپقانىن ايتتى.

"The Qazaq Times"