قىتايدا ادامعا جۇعاتىن جاڭا قۇس تۇماۋى تارالىپ جاتىر

قىتايدىڭ حۋنان پروۆينتسياسىندا، H7N9 اتالاتىن قۇس تۇماۋى ۆيرۋسىنىڭ ادامدارعا جۇعىپ جاتقانى جايلى، سينحۋا اگەنتتىگى حابارلايدى.

ۆيرۋس  يۋەيان قالاسىنىڭ 37 جاسار تۇرعىنىنان انىقتالدى. ونىڭ قازىرگى جاعدايى وتە اۋىر.

قاڭتار ايىنىڭ باسىنان باستاپ، وسىنداي جۇقپالى اۋرۋلاردىڭ قۇربانى بولىپ جاتقانداردىڭ سانى 16-عا جەتتى. ونىڭ ىشىندە 5 ادام بۇل دەرتتەن ايىعا الماي، قايتىس بولعان. H7N9 قۇس تۇماۋىنىڭ ۆيرۋسى حۋنان قالاسىنان بولەك، گۋاندۋن، گۋيچجوۋ، حۋبەي، حەنان، تسزيانسي، شاندۋن، شانحاي، گونكونگ جانە ماكاودا دا انىقتالعان.

حالىقارالىق دەنساۋلىق ساقتاۋ ۇيىمىنىڭ دەرەككوزىنە سۇيەنسەك، قۇس تۇماۋى – قۇستاردىڭ ينفەكتسيالى، كوزگە كورىنەتىن ەشبىر بەلگىلەرى جوق (سيرەك جاعدايدا، ادامدار مەن جانۋارلاردا ءوزىن-ءوزى جايسىز سەزىنۋ، ت.ب. بەلگىلەرى پايدا بولادى) جۇقپالى اۋرۋلارىنىڭ ءبىرى.

جۋرناليست سامات مۇسانىڭ قۇس تۇماۋى جايلى جازعان جازباسىندا بىلاي دەلىنگەن: «قۇس تۇماۋى» ۆيرۋسىنىڭ فەرمالار اراسىندا تارالۋىنا ادامدار مەن قۇرال-جابدىقتار سەبەپكەر. گونكونگتەگى 1997 جىلعى "قۇس تۇماۋى" پاندەمياسىن ەلدەگى بۇكىل ءۇي قۇستارىن جويۋ ارقىلى عانا اۋىزدىقتاۋ مۇمكىن بولعان. قازىرگى كەزدە ۆيرۋس بۇكىل ازياداعى ءۇي قۇستارى اراسىندا تاراعاندىقتان، ونىڭ الدىن الۋ مەن جويۋ اناعۇرلىم كۇردەلى.

ن5N1 (2006 جىلدارى قازاقستاننىڭ بىرنەشە قالالارىندا انىقتالعان قۇس تۇماۋىنىڭ ءتۇرى – رەد.) ۆيرۋسى الدىڭعىلارىمەن سالىستىر­عان­دا اسا مول اۋماقتى قامتۋى مۇمكىن. “قۇس تۇماۋىنىڭ” تارالۋىنا اسەر ەتەتىن فاكتورلار باقىلاۋعا الىنباعاندىقتان، ۆيرۋستىڭ ازيا ارقىلى ترانسميسسياسى ءبىر مەزگىلدە بولىپ وتىر. تاعى ءبىر نازار اۋداراتىن ماسەلە، “قۇس تۇماۋى” ۆيرۋسىنىڭ جىلدام ەۆوليۋتسيالانۋى كەلە-كەلە، ونىڭ ادامنان ادامعا تىكەلەي جۇعۋ ىقتيمال­دىلىعىن جوعارىلاتادى. ال مۇنداي جاعداي ورىن الاتىن بولسا، ونىڭ اقىرى ۇلكەن قاسىرەتكە اپارادى». بۇل 2006 جىلى جازىلعانىمەن، ءالى كۇنگە ماڭىزدىلىعىن جوعالتپاعان تاقىرىپ. سودان بەرى 11 جىل ءوتتى. بۇل تۇماۋازيا ەلدەرىندە  سامات مىرزانىڭ قاۋىپتەنگەن دەڭگەيىنە دە جەتتى. ەندى قايتپەك كەرەك؟

"The Qazaq Times"