كورنەكى سۋرەت. قازاقستاندا كوروناۆيرۋس پەن ونىڭ پنەۆمونيالىق تۇرىنە شالدىققاندار سانى ازايعانىمەن ساراپشىلار مەن زەرتتەۋشى ۇيىمدار كۇزگى تولقىن قيىنعا سوعۋى مۇمكىن ەكەنىن ايتادى. فوتو: اشىق دەرەككوز

جۇما، 11 قىركۇيەكتە قازاقستاندا 68 ادامنان كوروناۆيرۋس، 307 ادامنان پنەۆمونيا انىقتالعان. قىركۇيەك ايىنىڭ العاشقى ونكۇندىگىندە كوروناۆيرۋس پەن ونىڭ پنەۆمونيالىق ءتۇرىن قوسا ەسەپتەگەندە 4 368 اۋرۋ جاعدايى، 95 ءولىم وقيعاسى تىركەلدى.

دەنمين دەرەگىنشە، اۋرۋ جاعدايىنىڭ ەڭ كوبى ءتورت كۇن قاتارىنان شىعىس قازاقستان وبلىسىندا 18 ادامنان تابىلعان. اپتا باسىنان بەرى 86-عا ءوستى. وڭىردەگى جاعداي باسقا ايماقتارعا قاراعاندا ءورشىپ تۇر.

قازىرگى تاڭدا ەلدە 4 550 ادام ەمدەلىپ جاتىر. ونىڭ 2 431-ءى ستاتسيوناردا، 2 119-ى امبۋلاتوريادا.
جاعدايى قيىن 130 ناۋقاستىڭ 20-سىنىڭ احۋالى قاتتى ناشارلاعان. سونداي-اق، 26 ادام وكپەنى جاساندى جەلدەتۋ اپپاراتىمەن تىنىستاپ جاتىر.​

سونىمەن قوسا، جۇما كۇنى كوروناۆيرۋس پنەۆمونياسىنا شالدىققان 307 ادام تىركەلىپتى. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس شىققانىمەن، كوروناۆيرۋس سالدارىنان اسقىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە سوزىندە تۇرعان جوق. ءالى كۇنگە دەيىن كوروناۆيرۋس پنەۆمونياسىنىڭ وڭىرلەردەگى ديناميكاسىن بىلە الماي كەلەمىز.

ەلدە كوروناۆيرۋس جۇققانى پتر-تەستىمەن راستالعاندار 107 مىڭعا جۋىقتاسا، اقوكپەگە اسقىنعانى 29 مىڭنان استى. ددسۇ مالىمەتىنشە، قازاقستاندا اۋىرعانداردىڭ سانى 135 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەپ كەلەدى.

پاندەميا باستالعالى جالپى جيىنى ۆيرۋس جۇققانداردىڭ 2,5 مىڭنان ارتىعى (كۆي+ / U07.1 – 1661, كۆي- / U07.2 – 320, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"