ترامپ نوبەل سىيلىعىنا ۇسىنىلدى

Fox News تەلەارناسىنىڭ حابارلاۋىنشا، اقش پرەزيدەنتى دونالد ترامپ بەيبىتشىلىك بويىنشا نوبەل سىيلىعىنا ۇمىتكەر اتاندى.

تەلەارنا مالىمەتىنشە، نوبەل كوميتەتىنە رەسمي ءوتىنىشتى نورۆەگيا پارلامەنتىنىڭ وكىلى كريستيان تيبرينگ-گەددە جولداعان. حاتتا ترامپ اكىمشىلىگى يزرايل مەن ءباا اراسىندا بايلانىس ورناتۋعا ءوز ۇلەسىن قوسقانى جازىلعان.

نورۆەگيا دەپۋتاتى: «مەنىڭ ويىمشا، ول قوس مەملەكەت اراسىندا بەيبىت بايلانىس ورناتۋعا تىرىستى. ول باسقا بەيبىتشىلىك سىيلىعىنا ۇمىتكەرلەردىڭ اراسىندا كوبىرەك جۇمىس ىستەدى»، – دەيدى.

دونالد ترامپ سوڭعى 39 جىلدا مەملەكەتىن قارۋلى قاقتىعىسقا تارتپاعان اقش-تىڭ جالعىز پرەزيدەنتى. ول تاياۋ شىعىستان كوپتەگەن اسكەردى شىعارعان بولاتىن. امەريكا تاريحىندا پرەزيدەنتتەر اراسىنان باراك وباما قىزمەتكە كەلگەنگە دەيىن ياعني 2009 جىلى وسى پرەميانى يەلەنگەن.

بىلتىر ون سەگىز رەسپۋبليكالىق زاڭ شىعارۋشىلار مامىر ايىندا نوبەل كوميتەتىنە اقش كوشباسشىسى دونالد ترامپتى نوبەل سىيلىعىنا تاعايىنداۋ تۋرالى ۇسىنىس ءبىلدىرىپ، حات جولداعان. ولار ترامپتىڭ بيلىككە كەلگەن ساتىنەن باستاپ امەريكا مۇددەسى مەن الەمدىك جاعدايلاردى رەتتەۋ ماقساتىندا اتقارعان ەڭبەكتەرىن نازارعا العان.ماسەلەن، ترامپ «اراسىنان الا مىسىق وتكەن» وڭتۇستىك جانە سولتۇستىك كورەيا شەكاراسىن رەتتەۋگە اتسالىسىپ، جاھاندىق ماسەلەگە اينالعان يادرولىق قارۋدى جويۋدى باستى نازاردا ۇستادى. قىتاي ۇكىمەتىنىڭ ەتنيكالىق ۇلتتاردى جازىقسىز ازاپتاپ، ادام قۇقىعىن اشىقتان-اشىق تاپتاپ وتىرعانىن ماسەلە رەتىندە كوتەردى جانە قحر-عا بىرنەشە رەت سانكتسيالار ەنگىزدى.

وسىدان بىرنەشە جىل بۇرىن قازاقستاننىڭ بۇرىنعى پرەزيدەنتى، ەلدى 30 جىلعا جۋىق باسقارعان نۇرسۇلتان نازارباەۆتى نوبەل سىيلىعىنا ۇسىنۋ تۋرالى قىزۋ تالقىلاۋلار بولعان.

"The Qazaq Times"