اقش پرەزيدەنتى دونالد ترامپ. فوتو: https://gazeta

اقش-تا پرەزيدەنت سايلاۋىنىڭ فورماتىنا وزگەرىستەر ەنگىزىلىپ، داۋىس بەرۋ پوشتا ارقىلى ءوتۋى مۇمكىن. شىلدەدە سەناتور سيۋزان كوللينس باستاماسىمەن ۇسىنىلعان زاڭناماعا سايكەس پاندەميادان شىعىنعا باتقان USPS پوشتا اگەنتتىگىنە قوسىمشا 25 ملرد اقش دوللارىن ءبولۋ كوزدەلگەن. بىراق دونالد ترامپ پەن رەسپۋبليكالىق پارتيا وكىلدەرى بۇعان تۇبەگەيلى قارسى.

پوشتا ارقىلى داۋىس بەرۋ جۇرگىزىلەتىن بولسا، سايلاۋ ادىلەتسىز وتەدى دەيدى ترامپ. 28 شىلدەدە اقش باس پروكۋرورى ۋيليام بارر كونگرەستەگى تىڭدالىمبا قاراشاداعى سايلاۋدا پوشتامەن داۋىس بەرۋ سايلاۋ ناتيجەلەرىن بۇرمالاۋى مۇمكىن دەپ مالىمدەگەن. Twitter پاراقشاسىنداعى جازباسىندا ترامپ: «مەن داۋىس بەرۋ داتاسىن وزگەرتكىم كەلمەيدى. تەك ادىلەتسىز وتكەن سايلاۋدى كورگىم كەلمەيدى. سەبەبى پوشتا ارقىلى داۋىس بەرۋ ۇدەرىسى قانشالىقتى شىنايى وتەدى ەكەن؟ سوڭىندا بيۋللەتەندەر جوعالىپ، داۋىستاردى ەسەپتەۋ بىرنەشە ايعا سوزىلۋى مۇكمىن. مەن تەك ازاماتتارىمىزدىڭ ءوز ەركىمەن، قولىنداعى قۇجاتىمەن سايلاۋ ۋچاسكەلەرىنە كەلىپ تاڭداۋ جاساعانىن قالايمىن»، – دەپ جازعان.

پوشتا ارقىلى داۋىس بەرۋدىڭ ەرەجەسى ءار شتاتتىڭ زاڭىنا بايلانىستى وزگەرەدى. ماسەلەن، كاليفورنيا، نەۆادا نەمەسە يۋتا سياقتى شتاتتاردا داۋىس بەرۋشى رەتىندە تىركەلگەن كەز كەلگەن ازاماتتىڭ مەكەن جايىنا داۋىس بەرۋ بيۋللەتەنى اۆتوماتتى تۇردە جىبەرىلەدى. ال تەحاس نەمەسە تەننەسي شتاتىنىڭ تۇرعىندارى پوشتامەن تاڭداۋ جاساۋ ءۇشىن داۋىس بەرۋگە قاتىسا المايتىندىعىنىڭ سەبەبىن ءتۇسىندىرىپ، الدىن الا ءوتىنىم تولتىرۋ قاجەت.

بۇعان دەيىن دونالد ترامپ سايلاۋ كۇنىن كەيىنگە شەگەرۋ تۋرالى ۇسىنىس ايتقان بولاتىن. پرەزيدەنتتىڭ بۇل ويى رەسپۋبليكالىقتار مەن دەموكراتتار اراسىندا قىزۋ پىكىرتالاس تۋدىردى. نەگىزىنەن اقش كونستيتۋتسياسىنا ساي پرەزيدەنتتىك سايلاۋدى كەيىنگە قالدىرۋعا تەك كونگرەستىڭ عانا ۋاكىلەتتىلىگى بار. سونىمەن قاتار قۇراما شتاتتاردىڭ ءۇش فەدەرالدى زاڭى داۋىس بەرۋ كۇنىنىڭ وزگەرمەيتىنىن شەگەلەپ ەسكەرتكەن. نەگىزگى داتا – قاراشانىڭ العاشقى سەيسەنبىسى. بۇل – تاريحتا 1845 جىلدان بەرى قالىپتاسقان ەرەجە.

"The Qazaq Times"