ءۇندىستاننىڭ بانگالور ايماعىندا مۇسىلمانداردىڭ نارازىلىق شاراسى پوليتسيامەن قاقتىعىسقا ۇلاستى. مۇسىلمانداردىڭ نارازىلىق ەرەۋىلىنە الەۋمەتتىك جەلىدەگى مۇحاممەد پايعامبار تۋرالى پىكىر سەبەپ بولعان.

ءۇندى اقپارات قۇرالدارىنىڭ مالىمەتىنە قاراعاندا، نارازىلىققا سەبەپ بولعان جازبانى جەرگىلىكتى ساياساتكەردىڭ تۋىسى الەۋمەتتىك جەلىگە جاريالاعان. بۇل پىكىردى ايماقتاعى مۇسىلمان وكىلدەرى "مۇحاممەد پايعامبارعا ءتىل تيگىزۋ" دەپ ايىپتايدى. نارازى مۇسىلماندار ساياساتكەردىڭ ءۇيىنىڭ ماڭىنا توپتالىپ، ونى قاماۋعا الۋدى تالاپ ەتكەن. سوڭىندا نارازى توپ ساياساتكەردىڭ ۇيىنە باسىپ كىرىپ، پوليتسيانىڭ ارالاسۋىنا تۋرا كەلگەن.

كارناتكا شتاتىنىڭ بيلىگى قاقتىعىستا ءۇش ادام قازا تاپقانىن راستادى. جانجالعا تۇرتكى بولعان جازبا Facebook جەلىسىنەن وشىرىلگەن. حابارلاردا ناقتى قانداي پىكىر جازىلعانى انىق ايتىلمايدى.

شتاتتىڭ ىشكى ىستەر ءمينيسترى احاندا مۋرتي مۇسىلماندارعا قاراتا مالىمدەمە جاساپ، قوعامدىق ءتارتىپتى بۇزباۋعا شاقىردى جانە "كىنالىلەردىڭ جازاعا تارتىلاتىنىن" ايتتى.

ءۇندىستان الەمدەگى دىندەر مەن ناسىلدەردىڭ بارلىق ءتۇرى قاتار ءومىر ءسۇرىپ جاتقان ەل سانالادى. بيلىك تارابى زايىرلى ەل رەتىندە ەشبىر دىنگە باسىمدىق بەرمەيتىنىن ايتىپ كەلەدى. الايدا، سوڭعى ۋاقىتتا حالىقتىڭ باسىم كوبىن ۇستاعان مۇسىلماندارعا قاراتا ەلدە جاعىمسىز پىكىرلەر كۇشەيگەن.

• بۇدان تۋرا ءبىر جىل بۇرىن مۇسىلماندار شوعىرلى قونىستانعان كاشمير ايماعىنىڭ اۆتونوميالى ستاتۋسى الىنىپ تاستالعان ەدى.

• اقپاندا دەليدەگى مۇسىلماندار قونىستانعان ايماققا جاسالعان شابۋىلدان 27 ادام كوز جۇمعان بولاتىن.

• بىلتىر جىل سوڭىندا ءۇندىستان ۇكىمەتى اۋعانستان، پاكىستان جانە بانگلادەشتەن باس ساۋعالاپ كەلگەندەرگە جەڭىلدەتىلگەن جولمەن ازاماتتىق بەرۋ زاڭىن قابىلدادى. الايدا، بۇل زاڭعا مۇسىلماندار قامتىلماي قالدى.
• اتالعان زاڭ جوباسى ەلدەگى مۇسىلمانداردىڭ نارازىدىعىن قوزعاپ، ەلدەگى ءىرى قالالاردا نارازىلىق اكتسياسى وتكەن بولاتىن.

"The Qazaq Times"