اقش پرەزيدەنتى دونالد ترامپ شىڭجاڭداعى ۇيعىر، قازاق جانە وزگە دە مۇسىلمانداردى قۋدالاۋعا اتسالىسقان قىتايدىڭ جوعارى لاۋازىمدى شەنەۋنىكتەرىنە سانكتسيا ەنگىزۋ تۋرالى شەشىمگە كەلدى.

قۇجاتتا: «شىڭجاڭداعى جەكەلەگەن مۇسىلمان توپتاردىڭ قۇقىقتارىن ورەسكەل بۇزۋدى ايىپتايدى جانە ناقتى تۇلعالارعا سانكتسيا سالۋ وكىلەتىن بەرەدى» – دەلىنگەن. اق ءۇي باسشىسى قىتايدا بيلىگى ازشىلىق ۇلتتارعا قىسىم كورسەتىپ، ادام قۇقىعىن تاپتاپ وتىر دەپ مالىمدەدى.

«ۇيعىرلارعا قاتىستى ادام قۇقىعى سالاسىنداعى ساياسات تۋرالى» زاڭعا سايكەس پرەزيدەنت 120 كۇن ىشىندە ۇيعىرلاردى قۋدالاۋعا اتسالىسقان قىتاي شەنەۋنىكتەرىنىڭ ءتىزىمىن جاسايدى. سونىمەن قاتار اقش-تىڭ ارنايى قىزمەتى مەن مەملەكەتتىك دەپارتامەنتى كونگرەسكە قىتايداعى ۇيعىرلاردىڭ جاعدايى تۋرالى تۇراقتى تۇردە حابار بەرىپ وتىرۋعا مىندەتتى.

امەريكا بيلىگىمەن قاتار، حالىقارالىق قۇقىق قورعاۋشى ۇيىمدار قىتايداعى ەتنيكالىق توپتاردىڭ جاعدايىنا باسا نازار اۋدارۋدا. كەي دەرەكتەر بويىنشا شىڭجاڭداعى «ساياسي لاگەرلەردە» مىڭداعان قازاق قاماۋدا وتىر. وسىعان دەيىن اقش قۇقىق قورعاۋشىلارى بەيجىڭدى شىڭجاڭداعى تۇركىتىلدەس مۇسىلماندارعا قارسى جۇيەلى ناۋقان ۇيىمداستىرىپ كەلەدى دەپ ايىپتاعان بولاتىن. سونىمەن قاتار ولار «ادام قۇقىعىن تاپتاپ، كەي ۇلتتارعا جازىقسىزدان-جازىقسىز قورلىق كورسەتىپ وتىرعان» قحر-دى «قۇقىق ساقتالماعان ايماق» دەپ اتادى.

"The Qazaq Times"