امەريكا پرەزيدەنتى دونالد ترامپ. فوتو: reuters

امەريكا ەندى وزگە ەلدەردەگى اسكەري قاقتىعىستارعا ارالاسپايدى. «ۆەست-پوينت» اسكەري اكادەمياسىنىڭ تۇلەكتەرى الدىندا ەل پرەزيدەنتى دونالد ترامپ وسىلاي دەپ مالىمدەدى.

ترامپ سوزىندە : «اقش ءۇشىن شەكسىز سوعىستار زامانى اياقتالدى. امەريكا بۇدان بىلاي وزگە ەلدەردەگى اسكەري قاقتىعىستارعا ارالاسىپ، ولاردى رەتتەۋمەن اينالىسپايدى. ەشكىمگە ءجونسىز ۇرىنبايدى. سوققى بەرمەيدى، سوقتىقپايدى»، – دەدى. بۇعان دەيىن اق ءۇي باسشىسى گەرمانيادان 9 مىڭنان استام جاۋىنگەرىن شىعاراتىنى تۋرالى ايتقان. رەسمي بەرلين ترامپتىڭ مالىمدەمەسىن سىنعا الدى.

سونىمەن قاتار جيىندا دونالد ترامپ: «ءبىز ءتۇبى جوق سوعىس تۇسىنىگىنە بالتا شاۋىپ، قاقتىعىستار كەزەڭىن اياقتايمىز. اقش بۇدان بىلاي تەك ءوز مۇددەسىن قورعايدى. ەشكىمنىڭ ىسىنە ارالاسپايمىز. مەيلىنشە ءوز شەبىمىزدى قورعاۋمەن اينالىسامىز. اقش اسكەرى كىسى بالاسى بىلە بەرمەيتىن، ەل ەستىمەگەن شالعايداعى  قاقتىعىستارعا باس سۇقپاۋى ءتيىس. وزگەنىڭ ماسەلەسىن شەشۋ ەندى ءبىزدىڭ ءىس بولماۋى كەرەك. ءبارىن تارتىپكە شاقىراتىن الەم پوليتسياسى سەكىلدەنگەن مەملەكەت ەمەسپىز. بىراق بىزگە سوقتىققانداردى ايامايمىز»، – دەدى.

"The Qazaq Times"