دۇنيەجۇزىلىك دەنساۋلىق ساقتاۋ ۇيىمىمەن بايلانىسىن ۇزگەن اقش پرەزيدەنتى دونالد ترامپ قىتاي عالىمدارىنا كۇدىكپەن قارايتىنىن ايتتى.

اق ءۇي باسشىسىنىڭ سوزىنشە، قىتايلىقتار اقش-تىڭ قۇپيا تەحنولوگيالارى مەن زياتكەرلىك مەنشىگىن ۇرلاۋى مۇمكىن دەگەن كۇدىك بار. بىلتىردىڭ وزىندە 50-دەن اسا ادامعا وسىنداي ايىپ تاعىلعان. بۇعان دەيىن اقش-تىڭ ساۋدا مينيسترلىگى قىتايدىڭ 24 كوممەرتسيالىق جانە ۇكىمەتتىك ۇيىمىنا قارسى سانكتسيا ەنگىزگەن. ولارعا «اسكەري ماقساتتا جاپپاي قىرىپ-جويۋ قارۋىن جاساۋ ءۇشىن اقش تاۋارلارى مەن تەحنولوگيالارىن يمپورتتايدى» دەگەن ايىپ تاعىلعان.

دۇنيەجۇزىلىك دەنساۋلىق ساقتاۋ ۇيىمىنا دا وسىعان ۇقساس ايىپ تاعىلدى. ترامپ سوزىندە حالىقارالىق ۇيىم كوروناۆيرۋستىڭ ورشىگەنىن بىلە تۇرا، قىتايعا ىندەتتىڭ تارالۋى تۋرالى مالىمەتتى جاسىرىپ قالۋعا كومەكتەسكەنىن ايتتى. دونالد ترامپ: «قىتايدىڭ ۋحان ۆيرۋسى تۋرالى مالىمەتتى جاسىرىپ قالۋى ينفەكتسيانىڭ بۇكىل الەمگە تاراۋىنا جول اشتى. ءسويتىپ، ونىڭ ارتى پاندەمياعا ۇلاسىپ، ىندەت ءجۇز مىڭداعان ادامنىڭ ءومىرىن قيدى. قىتايلىق شەنەۋنىكتەر دۇنيەجۇزىلىك دەنساۋلىق ساقتاۋ ۇيىمىنا ناقتى اقپارات ۇسىنۋ بويىنشا ءوز مىندەتتەمەلەرىن ورىنداعان جوق. كەرىسىنشە، وعان قىسىم كورسەتتى. وسى رەتتە ۇيىم ءبىز تالاپ ەتكەن رەفورمالاردى ىسكە اسىرا الماعاندىقتان، ونىمەن اراداعى بايلانىستى ۇزبەكپىز»، – دەدى.

اقش پرەزيدەنتى وسىعان دەيىن دە بىرنەشە رەت ۇيىم باسشىلىعىنىڭ بەيجىڭمەن مامىلەگە بارعانىن ايتىپ، ايىپتاعان بولاتىن. سول سەبەپتى قۇراما شتاتتار اتالعان ۇيىمدى قارجىلاندىرۋدان باس تارتىپ، وعان مۇشە بولۋدى توقتاتىنىن مالىمدەگەن. بۇل جونىندە دونالد ترامپ تەدروس گەبرەيەسۋسقا جولداعان حاتىندا جانە Twitter-دەگى پاراقشاسىندا جازدى.

"The Qazaq Times"