تەڭىز كەنىشىندەگى جۇمىسشىلار قالاشىعى. فوتو: اشىق دەرەككوز

اتىراۋ وبلىسىنداعى توتەنشە جاعدايدى قامتاماسىز ەتۋ جونىندەگى جەدەل شتاب ايماقتا 432 ادامنىڭ كوروناۆيرۋس ينفەكتسياسىن جۇقتىرعانىن راستادى.

شتاب تاراتقان مالىمەتكە قاراعاندا، قاۋىپتى كەسەلگە شالدىققان ناۋقاستاردىڭ اراسىندا 90 ادام – تەڭىز كەنىشىندەگى مەردىگەر مەكەمەلەردىڭ جۇمىسشىلارى. دالىرەك ايتقاندا، 83 ەر ادام جانە 7 ايەل. بۇل بۇگىن انىقتالعان دەرەك. جاعدايدىڭ الداعى ۋاقىتتا قالاي ءوربيتىنى بەلگىسىز.

قازىرگى ۋاقىتتا ناۋقاستارمەن بايلانىستا بولعان ادامدار انىقتالىپ جاتىر، بارلىعى مەديتسينالىق باقىلاۋعا الىنعان. ينفەكتسيا وشاقتارىنا دا دەزينفەكتسيا جۇمىستارى جۇرگىزىلۋدە.

ايماقتىق جەدەل شتاب «Covid-19 جۇقتىرعان تاعى ەكى جاعداي اتىراۋ قالاسىندا تىركەلدى. ولار 52 جاستاعى ايەل مەن 27 جاستاعى ەر ادام. ولارمەن بايلانىستا بولعان ادامداردىڭ ءتىزىمى جاسالىپ، اۋرۋ وشاعىنا دەزينفەكتسيالىق جۇمىستار جۇرگىزىلۋدە»، – دەپ مالىمدەدى.

13 مامىرداعى جاعداي بويىنشا وڭىردە COVID-19 ىندەتىن جۇقتىرعان ناۋقاستار سانى 432-گە جەتتى، ونىڭ  ىشىندە 359 ادام – تەڭىز كەنىشىنىڭ قىزمەتكەرلەرى.

بۇگىنگى تاڭدا تىركەلگەن كەيستەر سانى جاعىنان اتىراۋ وبلىسى (432 جاعداي) رەسپۋبليكاداعى ءۇشىنشى ايماق. قازاقستاندا 5417 ادامنان Covid-19 دەرتى انىقتالعان، ونىڭ 2223-ءى اۋرۋىنان ايىقتى دەلىنسە، وكىنىشكە قاراي، 32 قايتىس بولدى.

"The Qazaq Times"