كورنەكى سۋرەت. فوتو: esquire.kz

قازاقستاندا العاشقى كوروناۆيرۋس جۇقتىرۋ جاعدايى انىقتالعان 13 ناۋرىزدان بەرى، 58 كۇننىڭ ىشىندە ەلدەگى ناۋقاستار سانى 5 مىڭنان استى.   

5036 كەيستىڭ جىكتەلىمى:

  • الماتى ق. – 1571,
  • استانا – 1049,
  • اتىراۋ وبلىسى – 296,
  • بقو – 239,
  • شىمكەنت ق. – 229,
  • قىزىلوردا وبلىسى – 229,
  • قاراعاندى وبلىسى – 191,
  • الماتى وبلىسى – 182,
  • جامبىل وبلىسى – 178,
  • تۇركىستان وبلىسى – 174,
  • اقتوبە وبلىسى – 172,
  • پاۆلودار وبلىسى – 154,
  • ماڭعىستاۋ وبلىسى – 120,
  • اقمولا وبلىسى – 109,
  • قوستاناي وبلىسى – 61,
  • شقو – 48,
  • سقو – 34 ادامنان ۆيرۋس تابىلعان.

دەرتىنەن ايىققان 1766 ادامنىڭ ەڭ كوبى  الماتى قالاسىنان (391), استانادان (369) جانە قىزىلوردا وبلىسىنان (156), شىمكەنتتەن (119). باسقا وڭىرلەردە ساۋىعىپ شىققاندار سانى جۇزگە جەتە قويماعان.

ال قايتىس بولعان جالپى 31 ادامنىڭ 9-ى الماتى، 5-ەۋى شىمكەنت قالالارى مەن 4-ەۋى اقمولا وبلىسىنىڭ تۇرعىندارى. سونداي-اق استانا مەن قاراعاندى وبلىسىندا 3 ناۋقاستان، پاۆلودار وبلىسىندا 2 ناۋقاس جانە شق، قوستاناي، ماڭعىستاۋ، تۇركىستان وبلىستارىندا ءبىر ادامنان قايتقان.

تۇتاس الەمدى ەسەڭگىرەتكەن جۇعۋى جىلدام ءارى اسا اۋقىمدى ىندەتتى جۇقتىرۋشىلار سانى بويىنشا قازاقستان قازىرگى تاڭدا دۇنيەجۇزىندە 56-ورىندا تۇر. رەسپۋبليكاداعى 17 ءوڭىردىڭ 13-ىندە تىركەلگەن كەيستەر سانى جۇزدەن اسىپ كەتكەن.

قازاقستانداعى نەگىزگى كەيستەر رەەسترى:

  • 13 ناۋرىز ساعات 14.30 – ءبىرىنشى ناۋقاس (74 كۇندە)*;
  • 13 ءساۋىر ساعات 23.40 – 1 000 ناۋقاس (31 كۇندە);
  • 22 ءساۋىر ساعات 09.25 – 2 000 ناۋقاس (10 كۇندە);
  • 27 ءساۋىر ساعات 17.40 – 3 000 ناۋقاس (6 كۇندە);
  • 4 مامىر ساعات 18.35   – 4 000 ناۋقاس (7 كۇندە);
  • 10 مامىر ساعات  – 5 000 ناۋقاس (6 كۇندە)

*Wikipedia: 2019 جىلى 31 جەلتوقسان كۇنى قىتايدا العاشقى جاعداي تىركەلدى.

قازاقستاننىڭ باس مەملەكەتتىك سانيتارلىق دارىگەرى ايجان ەسماعامبەتوۆا اپتا باسىندا «ەلدە ەپيدەميولوگيا احۋالى تۇراقتانعانىن» ايتىپ، كارانتين اقىرىنداپ جەڭىلدەيتىنىن حابارلاعان. بۇعان دەيىن ساۋىردە ايجان ەسماعامبەتوۆا ەلىمىزدەگى كوروناۆيرۋس ينفەكتسياسى «شارىقتاۋ شەگىنە جەتتى» دەپ مالىمدەگەن. ول تىركەلگەن ناۋقاستار سانى «ءساۋىردىڭ سوڭىنا قاراي 2700, ال مامىر ايىنىڭ اياعىندا 4000-عا جەتەتىنىن» حابارلاپ ەدى. ارتىنشا جاۋاپتى مينيسترلىك بولجامىن قايتا تۇزەتىپ، مامىر ايىنىڭ سوڭىنا قاراي ىندەتكە شالدىققان قازاقستاندىقتاردىڭ قاتارى 5,3 مىڭعا دەيىن جەتەدى دەگەن. بىراق ساراپشىلار كەيىنگى كۇندەردەگى قاۋىپتى كەسەلدىڭ قارقىنىنا قاراپ، تج رەجيمىن الىنعان جاعدايدا اي سوڭىنا دەيىن كوروناۆيرۋس جۇقتىرۋشىلار قاتارى 7 مىڭنان اسادى دەپ بولجايدى.

قازىر الەمدە  4 ميليوننان استام ادامنىڭ كوروناۆيرۋس جۇقتىرعانى بەلگىلى. ولاردىڭ 280 مىڭنان كوبىن دەرت مەڭدەپ قايتىس بولسا، 1,4 ميلليونى اۋرۋىنان ايىعىپ، ۇيىنە جىبەرىلگەن.

"The Qazaq Times"