شىمكەنت قالاسىنىڭ اباي اۋدانىنداعى بلوك-بەكەتتىڭ ءبىرى. فوتو: otyrar.kz

كوروناۆيرۋس ينفەكتسياسىن جۇقتىرعان ادامداردىڭ رەەسترىنە تۇستە تاعى 47 ناۋقاس تىركەلدى.

ناقتىراق ايتقاندا، پاۆلودار وبلىسىندا – 13,
قاراعاندى وبلىسىندا – 2,
قىزىلوردا وبلىسىندا – 3,
جامبىل وبلىسىندا – 4,
ماڭعىستاۋ وبلىسىندا – 6,
شىمكەنت قالاسىندا – 8,
اتىراۋ وبلىسىندا – 1,
الماتى قالاسىندا – 10 ادام تىركەلدى.

جالپى جيىنى انىقتالعان كەيستەر كۇن ساناپ ارتىپ كەلە جاتقان  الماتىدا مىڭنان استام (1140) ادام قاۋىپتى كەسەل جۇقتىرعان. ال استانادا 650 ادامنان اۋرۋ راستالىپتى. قىزىلوردا وبلىسى مەن شىمكەنت قالاسىندا كەيستەر سانى 200-دەن اسىپ كەتتى. دەرتكە شالدىققاندار قاتارى باتىس قازاقستان جانە قاراعاندى وبلىستارىندا 150-ءدىڭ، سونداي-اق پاۆلودار، الماتى، اتىراۋ وبلىستارىندا 140-تىڭ ۇستىنە شىققان. ەڭ تومەنگى كورسەتكىش شىعىس قازاقستان وبلىسىندا 23 ناۋقاستان كوروناۆيرۋس ينفەكتسياسى تابىلعان.

جالپى جيىنى 3,5 مىڭنان استام ادامى دەرتكە شالدىققان قازاقستاننىڭ بەس وڭىرىنەن باسقا 12 ايماعىندا كەيستەر سانى جۇزدەن اسىپ كەتتى. الەۋمەتتىك جەلى قولدانۋشىلارى، بەلسەندىلەردىڭ كوبى مۇنى، دەرتتىڭ ايماقتارعا تاراۋىنا جول بەرگەن «كارانتين جاريالار كەزدە كەمشىلىك جىبەرگەن بيلىكتىڭ جىبەرگەن كەمشىلىگى» دەپ سىناۋدا.

تۇتاس الەمدى ەسەڭگىرەتكەن جۇعۋى جىلدام ءارى اسا اۋقىمدى ىندەتتى جۇقتىرۋشىلار سانى بويىنشا قازاقستان قازىرگى تاڭدا دۇنيەجۇزىندە 58-ورىندا تۇر. رەسمي مالىمەتتەرگە قاراعاندا، ەلدە كوروناۆيرۋس جۇقتىرعان 879 ادام ساۋىعىپ شىققان. وكىنىشكە قاراي، 25 ازامات كوروناۆيرۋستان قايتىس بولعان.

"The Qazaq Times"