پوروشەنكو زەلەنسكيگە: كنب-لىك مانيپۋلياتسياعا الدىرما

بۇگىن ۋكراينا، رەسەي، گەرمانيا جانە فرانتسيا ليدەرلەرى پاريجدە باس قوسىپ، ۋكراينا شىعىسىنداعى قايشىلىقتى شەشۋ ءۇشىن ۇستەل باسىنا وتىرادى. بۇل سوڭعى ءۇش جىل ىشىندەگى «نورماند فورماتىنداعى» العاشقى كەزدەسۋ جانە ۆلاديمير پۋتين مەن ۆلاديمير زەلەنسكي اراسىنداعى ءبىرىنشى رەتكى كەزدەسۋ.

بىراق، كەزدەسۋدىڭ ناتيجەسى تۋرالى ۇمىتتەن كۇدىك باسىم. كوپتەگەن اقپارات قۇرالدارى ۋكراينانىڭ شىعىسىنداعى داعدارىستىڭ نۇكتەسى پاريجدە قويىلمايدى دەپ قارايدى.

ۋكراينا پرەزيدەنتى زەلەنسكي پاريجە رەسەي پرەزيدەنتىمەن كەزدەسكەلى جاتقاندا كيەۆتە وپپوزيتسيا تارابى شەرۋ ۇيىمداستىرىپ «كاپيتۋلياتسياعا جول جوق!»، «ماسكەۋدەن الىس بول!»، «رەسەيدىڭ گازى – موينىڭداعى اجىرعى» دەگەن جالاۋلار كوتەردى.

پاريجدەگى جۇرت نازارىن اۋداراتىن وقيعا – پۋتين مەن زەلەنسكي اراسىنداعى كەزدەسۋ بولماق. بۇعان دەيىن ەكى ەل باسشىسى تەك تەلەفون ارقىلى عانا سويلەسكەن ەدى. زەلەنسكي پاريجگە اتتانار الدىندا رەسەي پرەزيدەنتىمەن ەكىجاقتى كەزدەسۋدى جوسپارلاعانىن راستادى. ال، ۋكراينانىڭ بۇرىنعى پرەزيدەنتى پەتر پوروشەنكو زەلەنسكيدى پۋتينمەن كەزدەسپەۋگە شاقىرعان.

ۋكراينانىڭ بۇرىنعى پرەزيدەنتى پەتر پوروشەنكو. فوتو: in.ua

پوروشەنكو سوزىندە «پۋتينمەن بەتپە-بەت سويلەسۋدەن اۋلاق بول دەپ شىن جۇرەكتەن كەڭەس بەرەر ەدىم، ەگەر بۇل مۇمكىن بولماسا، وندا كنب-لىك مانيپۋلياتسياعا الدىرماي، ەموتسيالىق ويلاردان ساق بول»، – دەگەن.

ال، زەلەنسكي پاريجگە اتتانار الدىندا: «مەن نەدەن قورقام؟! مەن ەركىن ەلدىڭ پرەزيدەنتىمىن. مەن نورمالدى تازا اداممىن. مەن ءوز مەملەكەتىمدى ەشكىمگە، ەش ۋاقىتتا ساتپايمىن. اقيقات ءبىزدىڭ جاقتا»، – دەگەن.

پۋتين بولسا سامميت تۋرالى: «ولار جاقسى دايىندالىپ كەلىپ، قۇر سوزگە بوي ۇرماي، ناتيجەلى كەزدەسۋ بولسا بولدى»، – دەپتى.

«نورماند فورماتىنداعى» كەزدەسۋ تۋرالى تامىزدا زەلەنسكي باستاما كوتەرگەن ەدى. پۋتين دە «تورتتىك» كەزدەسۋدى قۇپتاعان. ونىڭ رەسمي وكىلى دميتري پەسكوۆ تا قۇپتاعانىن ءبىلدىردى، بىراق ول سوزىندە: «بۇل كەزدەسۋدەن ەشقانداي ناتيجە كۇتۋدىڭ كەرەگى جوق»، – دەگەن بولاتىن.

“The Qazaq Times”