كوروناۆيرۋستىڭ جاڭا تۇرىمەن كۇرەسۋ جانە پاندەميا جاعدايىندا اليانستىڭ جۇمىسىن جالعاستىرۋ ناتو سىرتقى ىستەر مينيسترلەرى قاتىساتىن ۆيدەوكونفەرەنتسياسىنىڭ باستى تاقىرىبى بولادى.

ناتو باس حاتشىسى يەنس ستولتەنبەرگتىڭ ايتۋىنشا، بەينەكونفەرەنتسيا جابىق تۇردە وتەدى، سوندىقتان ونىڭ قۇپيالىلىعىنا كەپىلدىك بەرىلەدى.

ستولتەنبەرگ سوزىندە: «كوروناۆيرۋسقا قارسى كۇرەس ناتو سىرتقى ىستەر مينيسترلەرىنىڭ العاشقى ۆيدەوكونفەرەنتسياسىنىڭ باستى تاقىرىبى بولادى. مينيسترلەر داعدارىسقا جاۋاپ بەرۋ ءۇشىن ناتو-نىڭ مۇمكىندىكتەرىن قالاي ءتيىمدى پايدالانۋ كەرەكتىگىن تالقىلايدى.

ناتو جاھاندىق ەپيدەميولوگيالىق داعدارىستىڭ قاۋىپسىزدىك داعدارىسىنا اينالۋىنا جول بەرمەيدى، سوندىقتان مينيسترلەر اليانس وپەراتسيالارىن پاندەميا جاعدايىندا دا جالعاستىرۋدى تالقىلايدى»، — دەدى.

ول «قازىرگى داعدارىسقا جاۋاپ رەتىندە وداق پەن ونىڭ ەلدەرى قابىلداعان شارالاردى» قاراستىراتىنىن اتاپ ءوتتى.

«ءبىزدىڭ اسكەري ۇشاقتارىمىز مەديتسينالىق جابدىقتار مەن اۋرۋحانالارعا ارنالعان توسەك-ورىنداردى جەتكىزدى. ءدال بۇگىن تاڭەرتەڭ بىرنەشە ۇشاقتار تۇركيادان يتالياعا جانە يسپانياعا ناتو-نىڭ داعدارىسقا قارسى ارەكەت ەتۋ جونىندەگى ۇيلەستىرۋ ورتالىعى ارقىلى مەديتسينالىق زاتتاردى جەتكىزدى. گەرمانيادا بوس ورىندار بار، يتاليا مەن فرانتسيادان پاتسيەنتتەر قابىلدانادى. دارىگەرلەر البانيا مەن پولشادان يتالياعا باردى. امەريكا يتالياعا مەديتسينالىق جابدىقتاردى جەتكىزدى، چەحيا يتاليا مەن يسپانياعا 20 مىڭ قورعانىس كيىمدەرىن بەردى»، — دەدى ستولتەنبەرگ. ونىڭ ايتۋىنشا، ناتو ەلدەرىنىڭ اسكەري كۇشتەرى ءوز ەلدەرىندەگى ەپيدەمياعا قارسى شارالارعا دا قاتىسادى: ناۋقاستاردى تاسىمالداۋعا جانە قوعامدىق عيماراتتاردى دەزينفەكتسيالاۋعا قاتىسادى، سونىمەن قاتار قوعامدىق ءتارتىپتى ساقتايدى.

قازىر الەمدە 937 170 ادام دەرتكە شالدىعىپ، 47 267 ادام كوز جۇمعان. كوپتەگەن ەلدەر كوروناۆيرۋسقا قارسى كۇرەس ماقساتىندا توتەنشە جاعداي ەنگىزىپ، كارانتين رەجيمىنە كوشتى. وتكەن اپتادا G20 ءسامميتىنىڭ بەينەكونفەرەنتسياسى وسى ماسەلە جونىندە ۇيىمداستىرىلعان.

"The Qazaq Times"