قىرعىزستاندا كوروناۆيرۋسقا بايلانىستى جەكسەنبىدەن باستاپ توتەنشە جاعداي ەنگىزىلدى.

شەشىم وتكەن اپتادا پرەزيدەنت سوورونباي جەەنبەكوۆتىڭ قاتىسۋىمەن وتكەن قاۋىپسىزدىك كەڭەسىنىڭ وتىرىسىندا قابىلدانعان. جيىندا ەل اۋماعىندا ىندەتتىڭ تارالۋىنا توسقاۋىل قويۋعا باعىتتالعان شارالار تالقىلاندى.

قىرعىزستان ۇكىمەتى توراعاسىنىڭ ورىنباسارى كۋاتبەك بورونوۆ: «ەڭ الدىمەن ادامداردىڭ كوپتەپ جينالۋىنا شەكتەۋ ەنگىزۋ شارالارى بويىنشا شەشىم قابىلدانادى. بۇل ىندەتتىڭ تارالۋىنىڭ باستى سەبەبى بولىپ وتىر. وسىمەن قاتار حالىق كوپ قاتىسۋى مۇمكىن ءىس-شارالاردى وتكىزۋگە تىيىم سالىنادى»، — دەيدى.

كوروناۆيرۋس دەرتىنە بايلانىستى وتكەن وتىرىستا ۇكىمەتكە مەملەكەتتىڭ توتەنشە جاعداي رەجيمىنە كوشۋگە قاجەتتى وپەراتيۆتىك ءىس-قيمىلدار قاراستىرۋ تاپسىرىلدى. قولعا الىنعان شاراعا سايكەس ەلدى مەكەندەردە قوعامدىق كولىكتىڭ ءجۇرۋى جانە ادامداردىڭ قاتىناۋى شەكتەلەدى.

ايتا كەتەيىك، سوڭعى دەرەكتەر بويىنشا الەمدە ۆيرۋس جۇقتىرعاندار سانى 300 مىڭنان استى. قىرعىزستاندا 14 ادام اتالعان دەرتكە شالدىققان.

"The Qazaq Times"