كوروناۆيرۋس پاندەمياسىنىڭ ورشۋىنەن امەريكا ەكونوميكاسى رەتسەسسياعا ۇشىراۋى مۇمكىن. بۇل تۋرالى اق ۇيدە وتكەن بريفينگتە اقش پرەزيدەنتى دونالد ترامپ مالىمدەدى.

16 ناۋرىزدا امەريكانىڭ نەگىزگى يندەكستەرى  وننان استام پايىزعا تومەندەپ كەتكەن. Bloomberg سايتىندا ايتىلعانداي، بۇل سوڭعى 30 جىلداعى ەڭ ءىرى قۇلدىراۋلاردىڭ ءبىرى.

اق ءۇي باسشىسى: «كوروناۆيرۋستىڭ كەڭىنەن ەتەك جايۋى ەكونوميكانىڭ قۇلدىراۋىنا اكەلۋى مۇمكىن. بىراق ءبىز بۇل جاعدايدى ۆيرۋسپەن كۇرەس جاعىنان قاراستىرىپ وتىرمىز. ءبىز كەسەلدىڭ جولىن كەسكەن كەزدە قور نارىعىندا سۇرانىس ەداۋىر ارتادى. ەكونوميكادا ءدال سونداي جاعداي بولادى. مەنىڭ ويىمشا، ىندەتتىڭ تارالۋى توقتاپ، ءبارى اياقتالعان كەزدە كەرەمەت ءوسىمنىڭ كۋاسى بولاسىزدار»، — دەدى.

اقش بيلىگى كوروناۆيرۋس شىلدە-تامىز ارالىعىندا اياقتالادى دەگەن بولجام جاساپ وتىر. بىراق بۇل مەرزىم ۇزارۋى دا مۇمكىن.

سوڭعى دەرەكتەر بويىنشا، اقش-تا ۆيرۋس جۇقتىرعاندار 6 500-دەن اسىپ، 121 ادام ولگەن. ال الەمدە 198 602 ادام وسى اۋرۋعا شالدىعىپ، 7 988 ادام قايتىس بولعان.

"The Qazaq Times"