ۆەنگريانىڭ بۋداپەشت قالاسىندا كوروناۆيرۋس جۇقتىرعان قازاقستان ازاماتى ەمدەلىپ جاتىر. بۇل تۋرالى قازاقستاننىڭ سىرتقى ىستەر مينيسترلىگى حابارلادى.

ۆەدومستۆو حابارلاماسىندا: «2020 جىلعى 16 ناۋرىزدا قازاقستاننىڭ ماجارستانداعى ەلشىلىگىنە ءبىزدىڭ ءبىر ازاماتشامىز بۋداپەشت قالاسىندا كوروناۆيرۋس كۇدىگىمەن جەرگىلىكتى اۋرۋحانالاردىڭ بىرىنە جاتقىزىلعانى تۋرالى حابارلاما كەلىپ ءتۇستى. جۇرگىزىلگەن مەديتسينالىق تالداۋلاردىڭ ناتيجەلەرىنە سايكەس دارىگەرلەردىڭ كۇدىگى راستالدى. اتالعان جاعداي ءبىزدىڭ ديپلوماتتارىمىزدىڭ ەرەكشە باقىلاۋىندا»، – دەلىنگەن. قازىرگى ۋاقىتتا ناۋقاستىڭ دەنساۋلىعى تۇراقتى، ول اۋرۋحانادا ەم قابىلداپ جاتىر.

بۇگىننەن باستاپ ۆەنگريا شەتەل ازاماتتارىن ەل اۋماعىنا كىرگىزبەۋ تۋرالى شەشىم شىعاردى. سوڭعى اقپار بويىنشا، ەلدە 39 ادام كوروناۆيرۋستى جۇقتىرعان. بىرەۋى قايتىس بولعان. قاۋىپتىڭ كۇشەيۋىنە بايلانىستى مۇندا ادام كوپ جيىلاتىن جاپپاي شارالاردى وتكىزۋگە تىيىم سالىندى. كينوتەاترلار مەن كلۋبتار جابىلدى. تاماقتانۋ ورىندارى مەن دۇكەندەردىڭ كوبى تۇسكى ۇشتكەن كەيىن جۇمىس ىستەمەيدى. بىراق ازىق-تۇلىك دۇكەندەرى مەن ەمحانالار اشىق بولادى. بيلىك جاسى 70-تەن اسقان تۇرعىندارعا ۇيدەن شىقپاۋعا كەڭەس بەرىپ وتىر. پرەمەر-مينيستر ۆيكتور وربان ەلدىڭ بيۋدجەتىن وزگەرتۋگە تۋرا كەلەتىنىن ايتتى. بۇل رەتتە ۇكىمەت جۇمىس ورىندارىنىڭ ساقتالۋىنا كوپ كوڭىل بولەدى.

"The Qazaq Times"