بۇگىن، 16 ناۋرىز ساعات 14:00-دە مەملەكەت باسشىسى توقاەۆ رەسپۋبليكالىق تەلەارنالار ارقىلى ۇندەۋ جاسادى.

ول تج ەنگىزىلۋى مەن بيلىك تاراپىنان قولعا الىنعانىن ءسوز ەتتى. سونداي-اق ازاماتتاردىڭ دەنساۋلىعى ءۇشىن جاسالعان «وتە ماڭىزدى شەشىمدەر» تۋرالى ايتتى. «ۋاقىتشا دۇربەلەڭنەن ابىرويمەن ءوتۋ كەرەك» دەپ سانايتىن توقاەۆ ەل ازاماتتارى ۇكىمەتكە قولعابىس ەتۋگە شاقىردى. ەكونوميكالىق جاعدايدى باستى نازاردا ۇستاۋعا ۋادە ەتتى. ەكس-پرەزيدەنتتىڭ «ارقاسىندا» قاجەتتى قور قالىپتاسقانىن، ازىق-تۇلىك جەكتىلىكتى ەكەنىن حابارلادى. ونىڭ سوزىنشە، تج 30 كۇنگە سوزىلادى، قوعامدىق ءتارتىپتى كۇزەتۋ كۇشەيتىلىپ، كوپشىلىك بولىپ توپتاسۋعا قاتاڭ تۇردە تىيىم سالىندى.

«بۇكىل حالىقتى جۇدىرىقتاي جۇمىلۋعا، سابىر ساقتاۋعا» شاقىرامىن دەدى توقاەۆ.

مەملەكەت باسشىسىنىڭ سوزىنە قاراعاندا، بۇرىنعى پرەزيدەنت نازارباەۆتىڭ «كورەگەن ساياساتىنىڭ ناتيجەسىندە ەلدىڭ حالىقارالىق رەزەرۆى شامامەن 90 ملرد دوللارعا جەتكەن»، بۇل ەكونوميكا تۇراقتىلىعىنا كەپىل دەسەدى.

سونىمەن قاتار، وتاندىق كاسىپكەرلەردى قولداۋعا جانە جاڭا جۇمىس ورىندارىن اشۋعا 300 ملرد استام تەڭگە بولىنەدى. بىراق پرەزيدەنت تەڭگەنىڭ قۇلدىراۋى، مەديتسينالىق قۇرالدار جونىندە اشىپ ايتپادى.

پرەزيدەنت  №285 جارلىق بويىنشا كوروناۆيرۋس پاندەمياسىنا بايلانىستى بۇگىننەن باستاپ 15 ساۋىرگە دەيىن ەلدە توتەنشە جاعداي جاريالاعان بولاتىن. سونداي-اق توقاەۆتىڭ تەلەۆيزيا ارقىلى ۇندەۋ جاسايتىنىن كەشە  ءباسپاسوز حاتشىسى بەرىك ءۋالي Facebook-تەگى پاراعىندا حابارلاعان ەدى.

Dadax كومەرتسيالىق ەمەس كومپانياسىنا قاراستى Worldometer ستاتيستيكالىق اقپاراتتار بازاسىنىڭ سوڭعى دەرەگى بويىنشا، الەم جۇرتشىلىعىن ەلەڭدەتىپ، ەكونوميكاسىن تۇرالاتقان COVID-19 ىندەتىنە شالدىققاندار سانى – 170 مىڭعا جەتسە، قازا بولعاندار 6500-دەن استى.

"The Qazaq Times"