كورنەكى سۋرەت. فوتوكوللاج: اشىق دەرەككوز

دەنساۋلىق ساقتاۋ مينيسترلىگى بۇگىنگى جاعداي بويىنشا ەلدە 4 مىڭعا جۋىق ادام باقىلاۋدا تۇرعانىن حابارلادى.  

مينيسترلىكتىڭ بايانداۋىنشا، قحر مەن شەكارالاس مەملەكەتتەردەن كەلگەن ازاماتتارعا مونيتورينگ جالعاسۋدا.

«4650 ادامعا مونيتورينگ جۇرگىزىلدى، ونىڭ ىشىندە 1 «ا» ساناتى بويىنشا – 1217, 1 «ب» ساناتى بويىنشا – 189, 2 سانات بويىنشا – 3244 ادام مەديتسينالىق باقىلاۋدا بولدى.⠀بارلىعى 676 ادام باقىلاۋدان الىندى. 11 ناۋرىزداعى جاعداي بويىنشا بارلىعى 3974 ادام باقىلاۋدا تۇر» دەلىنگەن حابارلامادا. سونداي-اق، 11 ناۋرىزداعى احۋال بويىنشا، بارلىعى 90 ادام دەنە قىزۋىمەن جانە جرۆي-مەن، ونىڭ ىشىندە 1 «ب» ساناتى بويىنشا – 20 ادام، 2-سانات بويىنشا – 36 ادام، 3-سانات بويىنشا – 34 ادام ەمدەۋگە جاتقىزىلعان. ەمدەۋگە جاتقىزىلعان 90 ادامنىڭ ىشىنەن 52 ادام شىعارىلدى. 38 ادام ستاتسيوناردا جاتىر»، – دەلىنگەن ۆەدومستۆو حابارلاماسىندا.

مينيسترلىك مالىمەتىنشە، اۋرۋحاناعا جاتىزىلعان بارلىق پاتسيەنتتىڭ سىناماسىن قوسىمشا باقىلاۋ ءۇشىن الماتى قالاسىنىڭ ورتالىق رەفەرەنتتىك زەرتحاناسىنا جىبەرىلگەن. وندا ۇلتتىق بيوتەحنولوگيا ورتالىعىنىڭ فيليالى جانە ايقىمباەۆ اتىنداعى اسا قاۋىپتى ينفەكتسيالار ۇلتتىق عىلىمي ورتالىعى 2020 جىلدىڭ قاڭتارىنان باستاپ ددسۇ ۇسىنعان حاتتاما نەگىزىندە COVID-19 پتسر-دياگنوستيكاسىن بىرلەسىپ جۇرگىزىپ جاتقان كورىنەدى.

ۆەدومستۆو ەلدە «دارىلىك زاتتار مەن مەديتسينالىق ماقستاتتاعى بۇيىمدار، ينفەكتسيالىق اۋرۋحانالاردا وقشاۋلاۋعا ارنالعان بوكستار بار» دەگەنىمەن، ءار ايماقتا قاراپايىم مەديتسينالىق بەتپەردە بىرنەشە ەسەگە قىمباتتاپ كەتكەن.

سونىمەن قوسا دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس ينفەكتسياسىنىڭ تىركەلۋى جونىندەگى باس سانيتارلىق دارىگەر جانداربەك بەكشيننىڭ ايتقان بولجامىن راستاپ پىكىر ءبىلدىردى. كەشە، 10 ناۋرىزدا ورتالىق كوممۋنيكاتسيالار قىزمەتىندە وتكەن بريفينگتە باس سانيتار دارىگەر جانداربەك بەكشين الداعى 5-6 كۇن ىشىندە ەلدە كوروناۆيرۋس دياگنوزى تىركەلۋى مۇمكىن ەكەنىن ايتقان ەدى.

الەم كولەمىندە سارسەنبىدەگى جاعداي بويىنشا، قاتەرلى دەرتكە شالدىققانداردىڭ سانى – 119 مىڭعا، ال كوز جۇمعانداردىڭ قاتارى – 4286-عا جەتكەنى بەلگىلى بولدى.

“The Qazaq Times”