رەسەي پرەزيدەنتى ۆلاديمير پۋتين. فوتو: ار

رەسەيدىڭ نەگىزگى قارجى يندەكستەرى قۇلدىرادى، – دەپ حابارلايدى تاسس اقپارات اگەنتتىگى.

ماسكەۋ بيرجاسىنىڭ مالىمەتتەرىنە سايكەس، رەسەيدە ءىرى مۇناي-گاز كومپانيالارىنىڭ باعالى قاعازدارى 12-15%-عا («روسنەفت»، «لۋكويل»، «سۋرگۋتنەفتەگاز»، «گازپروم»), تۇتىنۋ سەكتورى 28%-عا («م. ۆيدەو»، «ماگنيت»، X5 Retail Group) تومەندەدى. رەسەي قارجى سەكتورىنىڭ باعالارى دا قۇلدىرادى. تەحنولوگيالىق كومپانيالاردىڭ اكتسيالارى بيرجالىق يندەكستەردەن كەيىن مينۋسقا كەتتى: «ياندەكس» 7%، «روستەلەكوم» 9%.

موسبيرجا يندەكسى 10,4%- عا، 2436 پۋنكتكە دەيىن، رتس يندەكسى 16% -عا، 1056 پۋنكتكە دەيىن (2019 جىلدىڭ قىسىنان بەرى ەڭ ازى) تومەندەدى،

9 ناۋرىزدا رەسەيلىك كومپانيالاردىڭ باعالى قاعازدارى لوندون جانە نيۋ-يورك قور بيرجالارىندا قۇلادى.

مۇناي باعاسىنىڭ رەكوردتىق قۇلدىراۋى ۆەنادا وتكەن وپەك+ ەلدەرىنىڭ مۇناي ءوندىرۋدى قىسقارتۋ تۋرالى ءساتسىز كەلىسسوزدەرىنەن كەيىن باستالىپ، نارىقتاعى جاعداي كۇرت تومەندەدى. قۇرامىندا رەسەي مەن قازاقستان دا بار وپەك+ توبى الەمدە كوروناۆيرۋستىڭ تاراۋىنا بايلانىستى سۇرانىس كەمىگەن شاقتا مۇناي باعاسىن ۇستاپ تۇرۋ ءۇشىن ءوندىرىستى ازايتۋ تۋرالى كەلىسسوز جۇرگىزگەن. بىراق كرەمل ءوندىرىستى وپەك ۇسىنعان كولەمدە ازايتۋعا كەلىسپەدى. وسىدان سوڭ ساۋد ارابياسى ازيا ءۇشىن مۇناي باعاسىن باررەلىنە ءۇش-ءتورت دوللارعا، اقش ءۇشىن جەتى دوللارعا دەيىن ءتۇسىرىپ جىبەردى.

قازاقستان ۇلتتىق بانكى سەيسەنبى كۇنى بازالىق ستاۆكانى 9,25%-دان 12%-عا دەيىن كوتەرگەنىن حابارلادى. قازاقستان قور بيرجاسىنداعى (KASE) تاڭەرتەڭگى ساۋدا قورىتىندىسى بويىنشا، دوللاردىڭ ورتاشا باعامى 393, 5 تەڭگە بولىپ بەلگىلەندى. بۇل 6 ناۋرىزداعى كۇندىزگى ساۋدا سەسسياسىنىڭ ناتيجەسىنەن كەيىنگى باعامنان 11 تەڭگەگە كوپ (مەرەكەگە بايلانىستى دەمالىس بولىپ جاريالانعان دۇيسەنبىدە قور جۇمىس ىستەگەن جوق). الماتىنىڭ اقشا ايىرباستاۋ ورىندارىندا 10 ناۋرىزدا اقش دوللارى كۇندىز شامامەن 397-398 تەڭگەدەن ساتىلدى.

"The Qazaq Times"