اقش پرەزيدەنتى دونالد ترامپ. فوتو: https://yimg.com

اقش-تا الدىن الا سايلاۋ قورىتىندىسى بويىنشا رەسپۋبليكالىق پارتيا وكىلى دونالد ترامپ سايلاۋشىلاردىڭ 85% داۋىسقا يە بولدى.

«سۋپەر سەيسەنبى» اتالاتىن سايلاۋ شەتەلدىك باسىلىمداردىڭ نەگىزگى تاقىرىبىنا اينالعان. دەموكراتتار اراسىنداعى پارتياىشىلىك داۋىس بەرۋ 14 شتاتتا ءوتتى. ونىڭ قورىتىندىسى بويىنشا امەريكانىڭ بۇرىنعى ۆيتسە-پرەزيدەنتى دجو بايدەن 10 شتاتتا جەڭىسكە جەتتى.

بايدەننىڭ نەگىزگى باقتالاسى بەرني ساندەرس ۆەرمونت، يۋتا، كولورادو مەن كاليفورنيادا باسىم ءتۇستى. ميللياردەر مايكل بلۋمبەرگ تەك امەريكالىق ساموادا باسىم داۋىس جيناپ، جارىس جولىنان شىعىپ قالدى. ەندى بلۋمبەرگ دەموكراتتار اتىنان شىعىپ وتىرعان ۇمىتكەرگە قارجىلاي كومەك كورسەتىپ، بايدەنگە داۋىس بەرەتىنىن ايتتى.

77 جاستاعى مايكل بلۋمبەرگ اقش-تاعى پرەزيدەنت سايلاۋىندا دونالد ترامپتىڭ باستى قارسىلاسى سانالعان. ول نيۋ-يوركتىڭ مەرى قىزمەتىن 2002 جىلدان 2013 جىلعا دەيىن اتقارعان. سونىمەن قاتار ول فيلانتروپ جانە اتاقتى قارجىلىق جاڭالىقتار اگەنتتىگىنىڭ نەگىزىن قالاۋشى رەتىندە دە تانىمال. ميللياردەر اقش-تاعى ەڭ باي ادامداردىڭ ءبىرى سانالادى. Forbes جۋرنالىنىڭ باعالاۋى بويىنشا ونىڭ بايلىعى 54 ميلليارد دوللاردان اسادى.

بلۋمبەرگ كوپ جىلدار بويى دەموكراتيالىق پارتيانىڭ مۇشەسى بولدى، بىراق ءوزىن 2001 جىلى نيۋ-يوركتىڭ مەرى ەتىپ ۇسىنعانعا دەيىن ول رەسپۋبليكاشىل رەتىندە تىركەلگەن. 2009 جىلى Bloomberg تاۋەلسىز ساياساتكەر رەتىندە ءۇشىنشى مەرزىمگە ۇمىتكەر بولدى. وتكەن جىلدىڭ قازاندا ول دەموكرات رەتىندە قايتا تىركەلدى.

ايتا كەتەيىك، امەريكاداعى كەزەكتى پرەزيدەنتتىك سايلاۋ 2020 جىلدىڭ 3 قاراشاسىندا وتەدى.

"The Qazaq Times"