جاڭا كوروناۆيرۋس – covid-19 ۆيرۋسى بايقالعان ەلدەردىڭ سانى 60-تان اسىپ كەتتى. الەم بويىنشا اتالعان ۆيرۋسقا شالدىققاندار سانى 90 مىڭ بولىپ، ونىڭ 80 مىڭنان استامى قىتايدا تىركەلگەن جانە قازا بولعانداردىڭ سانى 3 مىڭ ادامنان استى.

قىتايدا باستاپ تارالعان ۆيرۋس قازىر الەمنىڭ 64 ەلىنە تارادى. وسى تۇستا بۇۇ-داعى قىتاي وكىلى قىتايداعى جاعداي ءبىرشاما تۇراقتانىپ قالعانىن ايتتى. دەگەنمەن، دۇنيەجۇزىلىك دەنساۋلىق ساقتاۋ ۇيىمى يتاليادا ۆيرۋستىڭ تارالۋى قاۋىپتى دەڭگەيدە تۇرعانىن ايتتى. رەسمي مالىمەتتەرگە قاراعاندا، يتاليادا ۆيرۋستان كوز جۇمعاندار سانى 52-گە جەتكەن.

قاۋىپتى ۆيرۋس كورشىلەس رەسەيدى دە كەزىپ ءجۇر. كەشە عانا يتاليادان ماسكەۋگە ۇشىپ بارعان 13 ادام ەمحاناعا جاتقىزىلدى. ولارمەن ساپارلاس بولعان رەسەيلىك ازاماتتار دا كارانتينگە جاتقىزىلدى. بۇل كۇدىكتىلەردىڭ قاتارىندا جۋرناليستەر دە بار ەكەنى ايتىلادى.

بىراق، رەسەيدە ۆيرۋس قاۋپىنەن كورى ەلدە تاراپ جاتقان فەيك مالىمەتتەر ۇكىمەتتىڭ باسىن كوبىرەك قاتىرۋدا. رەسەيدە ورتالىق قالا ماسكەۋدە ۆيرۋستىڭ ماسسالىق كۇيدە تاراپ جاتقانى جانە ونى ۇكىمەتتىڭ جاسىرىپ وتىرعانى تۋرالى اقپارات كەڭىنەن تاراپ كەتكەن. ەل بيلىگى بۇل اقپاراتتىڭ جالعان ەكەنىن بىرنەشە رەت رەسمي مالىمدەمە ارقىلى ايتتى.

Group-IB مالىمەتىنە قاراعاندا بۇنداي فەيك مالىمەتتەر وتباسىلىق چاتتار مەن مەكتەپ وقۋشىلارىنىڭ اتا-انالارىنىڭ الەۋمەتتىك جەلى توپتارى ارقىلى تاراعان.

بۇنداي اقپاراتتار تەك قانا رەسەي دە عانا ەمەس، بەلارۋس، ۋكراينا، قىرعىزستان جانە قازاقستاندا دا بار. قاۋىپتى ۆيرۋس تۋرالى الىپ قاشپا اڭگىمە ەلىمىزدە دە بەلگىلى دەڭگەيدە الەۋمەتتىك جەلىلەردى كەزىپ ءجۇر. سولاي دا، بۇنداي توتەنشە جاعدايدا ۇكىمەتتىڭ بارىنشا اشىق بولىپ، حالىقتىڭ دۇرىس مالىمەتتەرگە قولجەتىمدىلىگىن قاداعالاۋى اسا ماڭىزدى.

“The Qazaq Times”