پرەزيدەنت توقاەۆ ۇلتتىق قوعامدىق سەنىم كەڭەسىنىڭ قۇرامىن جاڭارتۋ جونىندە جازبا جاريالادى.  

«ۇلتتىق قوعامدىق سەنىم كەڭەسىنىڭ جۇمىسىنا جۇرتشىلىقتى كەڭىنەن تارتۋ ماقساتىندا كەڭەس مۇشەلەرى الماستىرىلدى. ۇلتتىق كەڭەسكە بەلگىلى قوعام قايراتكەرلەرى كەلدى. كەڭەستىڭ بۇرىنعى مۇشەلەرىنە بەلسەندى جۇمىستارى ءۇشىن ريزاشىلىعىمدى بىلدىرەمىن»، – دەپ جازدى ول تۆيتتەر جەلىسىندەگى رەسمي پاراعىندا.

اقوردانىڭ مالىمەتىنە قاراعاندا، پرەزيدەنت جانىنداعى ۇلتتىق قوعامدىق سەنىم كەڭەسى روتاتسيالانىپ، جاڭا مۇشەلەرى قابىلدانعان. ولار:

  • ​بەلگىلى قوعام قايراتكەرى، ءماجىلىس دەپۋتاتى، اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ توراعاسى باقىتبەك سماعۇل;
  • بەلگىلى زاڭگەر، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات باشيموۆ;
  • قوعام قايراتكەرى، «مازمۇنداما" قب توراعاسى شىڭعىس مۇقان;
  • قازاقستاننىڭ جاڭارتىلاتىن ەنەرگەتيكا قاۋىمداستىعىنىڭ باس ديرەكتورى ارمان قاشقىنبەكوۆ;
  • «تالبەسىك» كوپبالالى انالار قوزعالىسىنىڭ جەتەكشىسى، جۋرناليست ءلاززات قوجاحمەتوۆا;
  • زاڭگەر، «ىزگىلىك ەلشىسى» رەسپۋبليكالىق ەرىكتىلەر قوزعالىسىنىڭ جەتەكشىسى اينۇر ءسابيتوۆا.

روتاتسيا اياسىندا ادام قۇقىقتارى جونىندەگى ۋاكىل ەلۆيرا ءازىموۆا، بالالار ومبۋدسمەنى ارۋجان ساين، بۇرىنعى بيزنەسمەن-ومبۋدسمەن بولات پالىمبەتوۆ، «قازاقستان بارىسى» قازاق كۇرەسىن دامىتۋ قورىنىڭ قامقورشىلىق كەڭەسىنىڭ توراعاسى ارمان شوراەۆ، ساياساتتانۋشى باقىتجان بۇقارباي، قازاقستان دامۋ بانكىنىڭ باسقارۋشى ديرەكتورى اسقار امىرتاەۆ ۇلتتىق كەڭەستىڭ قۇرامىنان شىعارىلدى. بۇعان دەيىن بەلگىلى باسپاگەر باقىتجان بۇقارباي ءوز ەركىمەن كەڭەس قۇرامىنان شىعاتىنىن مالىمدەگەن ەدى.

قوعامدىق بىرلەستىكتەر، ۇكىمەتتىك ەمەس ۇيىمداردىڭ، باق وكىلدەرى مەن بەلگىلى قوعام قايراتكەرلەرى، جەتەكشى ساراپشىلاردان تۇراتىن ۇلتتىق قوعامدىق سەنىم كەڭەسى بىلتىر ماۋسىمدا قۇرىلىپ، كۇزدە العاشقى وتىرىسى وتكەن بولاتىن. دەسەك تە بۇقارا مەن بيلىكتىڭ اراسىن جاقىنداتىپ، ديالوگ الاڭىن اينالادى دەگەن پلاتفورماعا سەنبەيتىن، كۇمانمەن قارايتىندار دا بار. ولار مۇنى «توقاەۆتىڭ ۇپاي جيناۋىنا بولا قۇرىلعان دارمەنسىز القا» دەپ سانايدى.

ۇلتتىق قوعامدىق سەنىم كەڭەسىنىڭ ءۇشىنشى وتىرىسى وسى جىلدىڭ ساۋىرىندە وتەدى.

"The Qazaq Times"