يزرايلدە 29 پارتيا مەن بىرلەستىك قاتىسقان كەزەكتەن تىس سايلاۋ ءوتىپ جاتىر. بۇل سوڭعى ءبىر جىلدا ەلدە ءوتىپ جاتقان ءۇشىنشى سايلاۋ.

بۇعان دەيىن وتكەن ەكى سايلاۋدان كەيىن ۇكىمەت قۇرۋعا ارنالعان ارەكەت ناتيجە بەرگەن جوق. بيلىك ءۇشىن باستى باقتالاس رەتىندە پرەمەر-مينيستر باسقاراتىن ليكۋد پارتياسى جانە گەنەرال گانتس جەتەكشىلىك ەتەتىن اق-كوگىلدىرلەر پارتياسى اتالىپ وتىر.

سوڭعى مالىمەتتەر بويىنشا، پرەمەر-مينيستر بينيامين نەتانياحۋدىڭ «ليكۋد» پارتياسى الدا كەلەدى. بۇل پارتيا ءوز بەتىنشە ۇكىمەت قۇرۋ ءۇشىن كنەسسەتتەگى 120 ورىننىڭ 61-ءىن الۋى كەرەك. نەتانياحۋ ءوزىنىڭ Twitter پاراقشاسىندا: «ءبىز حالىقتىڭ سەنىمى مەن ماقساتتارىمىزدىڭ ارقاسىنداجەڭىسكە جەتتى. ەندى باسقا پارتيا وكىلدەرىمەن كەزدەسىپ، تۇراقتى، مىقتى ۇكىمەت قۇرامىز»، – دەپ جازدى.

نەگىزىنەن ءيزرايلدىڭ 6 جارىم ميلليون حالقى سايلاۋ قۇقىعىنا يە. ورتالىق سايلاۋ كوميسسياسىنىڭ دەرەگىنشە، سوڭعى 11 ايدا سايلاۋ ۇيىمداستىرۋعا 800 ميلليون دوللار جۇمسالعان.

29 قاڭتاردا اقش پرەزيدەنتى دونالد ترامپ تاياۋ شىعىستاعى جاعدايدى رەتتەۋ جونىندە بەيبىت جوسپارىن جاريالاپ، يەرۋساليمدى ءيزرايلدىڭ استاناسى رەتىندە ساقتاپ قالۋعا ۋادە ەتكەن. ترامپتىڭ ويىنشا، يەرۋساليمنىڭ شىعىس بولىگى پالەستينانىڭ استاناسى بولۋى كەرەك. اقش پرەزيدەنتىنىڭ جوسپارىن يزرايل قولداعانىمەن، پالەستينا تارابى تۇبەگەيلى قارسى.

"The Qazaq Times"